Banda-Linda NT
1 Kɔratə 4
Azü-awla nə̂ Kristə
Rəkɔ, e wü ä tə alayïkosəra nə̂ Kristə, tə aawolishi pâ azü ə̂në kosəra nə̂ əndje kə də̂ kə yisə̂ Əpʉ nə̂ Ndjapä ə̂në ə sə lə kəwû kɔ gashu kə azü. Ə̂dû əpʉ nə, ərə ə̂në əndje yu tshuku nə kə aawolishi pâ azü nə kɔ, kə də̂ kə pa əzü bale bale mbrə kosəra nə̂ ye də äwänə. Ənə̂ əmə, ə sə sə tə ə̈bə̈ əpʉ bale ndə kə pa e za əpʉ gâ lə kumu əmə, wala alayïngbanga tshepashɔ səye za əpʉ gâ lə kumu əmə ne. Əmə də ə̂tə̂ əmə, mə sə sə kə wa tshelə ngbanga nə̂ əmə ne. Mbrə ə̂në, mâ tə̂ lɔsu əmə, əpʉ bale sə sə lə kumu əmə ne. Bale, ə də̂ mbrə əpʉ səkɔ də̂ mə sə tə ə̂rɔ̂ əzü nə kɔ ne. Awowa ngbanga əmə nə kə də̂ Âgbɔ̂ Əyïngerə. Rəkɔ, e wä ngbanga wä bale gâ lə kumu əzü əlînə ndə kə pa alɔ nə lï, alɔ kə gu Âgbɔ̂ Əyïngerə ne. Ətshə kə yisə̂ ərə ə̂në ə zâ tə̂ ye wû lə əbutshe kɔ gashu lə ala azü nɔ̂ je, ə yisə̂ âdâ aərə ə̂në ə sə tə̂ lɔsu azü kɔ gashu je. Bale, Ndjapä ə tra əzü bale bale ə lï də ərə ə̂në tshə mbrə̂ gâ ye kɔ je.
Alaye əmə, mbrə e də̂ mə kô alabə̈ aərə â yîsə̂ əpʉ gâ pâ əpʉ nə̂ əmə də ə̂tə̂ əmə də Apolɔsə kɔ. Mə yində nə ə pa e manda ərə tə̂ äwä ä, gâ pâ dame sə̂ ə̂në ə pa: «Əzü ro ro pa əpʉ ə̂në əndje tâ gâ lə fraka gâ ye kɔ ne.» Rə kanika əzü bale lə takpa tə̂ e da da əkro ye ə te gâ ndə ə̈bə̈ əzü ə wəra tə̂ ye tə̂ ə̈bə̈ nə ne. Mbrə ə̂në, əde kə pa kə əbə ə pa bə ro ə̂dû azü nɔ̂ gâ ye? Aərə nɔ̂ ə̂në bə sə də nə kɔ, ə də̂ Ndjapä də̂ kə kô kə əbə kɔ ne a? Kâ kədə bə sɔ̂tə̂ nə gâ ye, bə da əkro zə mbrə yea a pa də bə sɔ̂tə̂ nə sɔ̂ ne kɔ?
Tshelə e sû də aərə ə̂në e ma əgo nə kɔ gâ ye! E sə̂ də aərə ngbatshe gâ ye! E vɔ̂tə̂ kə mbrə ngerə nə tshî tə̂ ä gâ ye! Ngâ, mə yində nə ə pa e sə kə mbrə ngerə nə, kanika, ä-ä ndje, a də a-e mbrə ngerə nə! Mbrə ə̂në, mə wu ənə̂ əmə ə pa, Ndjapä kô ä, ä-ä də̂ azü-awla nə, tə azü tshe mandâ azü nɔ̂, mata azü ə̂në əndje wâ ngbanga kuzu gâ lə kumu əndje gâ ye kɔ: ä sə tə ərə məlɔ pâ ashɔ səye lə ala atrawaya nə̂ Ndjapä, lə ala azü ndje. Ä-ä, ä sə tə alayïyirə̈ mbrə Kristə nə, bale, e-e, e sə tə aawowusə̂ âdâ ərə tə̂ äwä Kristə nə. Ä-ä, ä mɔ ə mɔ, bale, e-e, e gbɔgbɔ tə̂ e ə gbɔgbɔ. E-e, azü lʉ e ə lʉ, ənə̂ ä, azü neke a ə neke! Ndjɔ kpəsəye, əgo sə kə mi ä, əgo ə̂ngû sə kə mi ä, ä sə sə də ləba ne, azü sə kə da ä, ä sə kə na ana kʉ ya ya lafɔ, ä sə kə ngɔ tə̂ ä ndə kə mbrə kosəra də kəna ä. Azü sə kə gu ä, ä sə kə e to ngwarə gâ pâ azü. Azü sə kə gi əyo tə̂ ä, ä sə kə ru tshelə ä. Azü sə kə pa tə̂ ä, ä sə kə zɨtɨ lɔsu azü. Ndjɔ kpəsəye, azü wu ä tə grishi pâ ashɔ, tə âwâ ərə ə̂në azü ə ko ve-e kɔ lə ala əndje.
Palɔ pâ əpʉ kə aneshe nə̂ ye
Mə ta fraka səye ta kə e ndə kə pa mə pa əpʉ gana gâ tə̂ e ne, bale mə yində kə pa mə gbətɔ ətu e tə aneshe nə̂ əmə ə̂në mə yində əndje ngbatshe kɔ. Mbrə ə̂në kədə e sə̂ kəmə də aawoyisə̂ ərə kə e sake morofo (10 000) lə əpʉ nə̂ Kristə, bale e sə sə də alabä ngbatshe ne. Mbrə ə̂në əmə kə zû e lə Jezu Kristə nə tə̂ äwä Ə̂rɔ̂ Əpʉ ə̂në mə yîsə̂ nə kə e kɔ. Rəkɔ, mə sə kə mʉ əpʉ kə e, e mbrə̈ ərə mata əmə. Mbrə əpʉ səkɔ də̂ mə wlâ Timɔte kə e kɔ, ə̂në tshə sə tə əgblə nə̂ əmə, ə̂në mə yində ye ngbatshe kɔ â kə mbrə tə̂ ye sə də äwänə lə əpʉ nə̂ Âgbɔ̂ Əyïngerə kɔ. Tshə yisə̂ äwä kə mbrə tə̂ əmə lə əpʉ nə̂ Kristə kə e je ndə kə pa lɔsu e te gâ pâ nə, mata ə̂në mə yisə̂ nə tə̂ ətshe nɔ̂ na na ye, lə Alaglizə nɔ̂ kɔ.
Alabə̈ azü lə takpa tə̂ e dâ əkro əndje ə pa ənə̂ əndje ə pa mə na na kwatə̂mə mâ ndə e je ne. Kandää, mə sə kə na katshä katshä səye mâ ndə e je, kədə Âgbɔ̂ Əyïngerə kə yində nə. Mə sə kə wusə̂ awlra kə mbrə ərə nə̂ azü nə ə̂në əndje da əkro əndje nə kɔ, ə də̂ aəpʉ nə̂ əndje nə də̂ mə dji ne. Mbrə ə̂në Əgɔngerə nə̂ Ndjapä nə sə sə tə̂ äwä əpʉ ama ne, bale ə sə tə̂ äwä awlra. E yində yekɔ? Mə na mâ ndə e je də ndjapa wala mə na də əpʉ kə yi tə̂ də zɨtɨ lɔsu a?
Banda-Linda NT. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.