1 Kɔratə

Əlî Fraka ə̂në Palɔ tâ kə Laglizə əgɔ

KƆRATƏ

Kumu əpʉ

Âdâ kə ta fraka səke də̂ yea

Palɔ kə sə̂ â tâ ngrowô səke â wlâ kə azü nə̂ Ndjapä mâ Kɔratə kɔ. Tshə nâ mâ je tə̂ alɔ bishi ana nə̂ ye, â mâ ə̂ngû bale də yipʉ mindû amanə bale mâ je. Tə̂ alɔ nə səkɔ də̂ tshə yîsə̂ əpʉ kə azü ə̂në əndje sə sə tə Ajuwufu ne kɔ, ʉrrr â əndje zâ äwä Kristə gâ ye kɔ.

Gala səkɔ sə̂ tə ə̂rɔ̂ gala tə̂ tshikɨ nə səkɔ, abato sə̂ kə afɔ tə̂ aətshe nɔ̂ ə sə̂ kə na mâ je, aawoka aərə sə̂ je ngbatshe. Azü ə̂në əndje mbrə̂ ərə ə̂trû kɔ ngbâ ə ngbâ ndje lə gala nə, mata lə ə̂dû əgbro agala nɔ̂ kɔ. Əndje kô azü nə̂ Ndjapä tshe Kɔratə nə ə yî əndje dââ gâ lə ərə nə̂ əndje nə gâ ye. Ərə səkɔ mbrə̂ â Palɔ nə lî tshelə ye ngbatshe ʉrrr â tâ ə̈bə̈ angbʉlî ngrowô â wlâ kə əndje (wu 1 Kɔratə 5.9) ndə kə pa tshə pa kə əndje ə pa əndje yi tə̂ əndje yi gâ lə aərə nə̂ azü səkɔ ne.

Ngâ, azü tshe Kɔratə nə wlâ ngrowô kə ətshə gâ ye. Bale əndje tshî aga əpʉ nə ə̂në tshə pâ kə əndje kɔ tʉ gâ ye. Alabə̈ azü nâ ə pâ əpʉ gâ pâ azü tshe Kɔratə nə kə Palɔ nə gâ ye, â əpʉ nə tô tô ne. Rəkɔ, tshə zâ ama ndə kə pa tshə ta ngrowô ə kirə əpʉ kə əndje gâ pâ aəpʉ ə̂në əndje yû ətshə də nə gâ ye kɔ, ə pâ ndje əpʉ lə ngrowô nə kə əndje.

Palɔ nə pâ əpʉ ngbatshe kə əndje gâ pâ alabə̈ aəpʉ mata əpʉ kə ia ətshe lə takpa tə̂ azü nə̂ Kristə nə, əpʉ kə ma ərə ə̂trû, əpʉ kə ko tə̂ ətshe, əpʉ kə zɨ dɔ̂ngɔ̂ ə̂në əndje tô də əkrɔ kə aamba andjapä gâ ye kɔ, də əpʉ aərə ə̂në Âgbɔ̂ Yîrə̂ ə ko kə azü kɔ, gâ ndə əpʉ kə she akuzu.

Palɔ nə mbrə̂ tə̂ ye teashe ətshi əndje ndə kə pa tshə pa əpʉ ə̂në tshə lï ndə kə pa kə əndje kɔ kə əndje. Tshə yîsə̂ nə kə əndje ə pa kʉ tə̂ äwä kə tegbɔ Kristə də kəna bishi də̂ əndje lï ndə gamba aərə səkɔ rə. Tshə pâ ndje əpʉ ə pa kə yində ə̈bə̈ əzü sə tə ə̈bə̈ âgbɔ̂ ərə ə̂në ə rô aərə nɔ̂ gâ ye.

Əpʉ tshelə fraka səke na rəke

1. (1.1-9) Əpʉ kə bla ətshe

2. (1.10–4.21) Azü nə̂ Kristə lï lï kəmə ndə kə mbrə awlra lə takpa tə̂ əndje ne, əndje lï lï kəmə ndə kə sɔ tshelə takpa tə̂ əndje ne

3. (5.1–6.20) Azü nə̂ Kristə lï lï kəmə ndə kə mbrə əmbrʉ ərə kə angâ əndje lə takpa tə̂ əndje ne

4. (7.1-40) Akoshe də alawɔ əndje

5. (8.1–11.1) Ndjapä də̂ azü lï ndə kə pa əndje dji əpʉ ama ye, ə də̂ aamba andjapä də̂ ne

6. (11.2–14.40) Äwä ə̂në azü nə̂ Kristə lï ndə kə pa əndje mbrə tə̂ əndje lə Laglizə

7. (15.1-58) Äwä ə̂në Kristə rô kuzu də awlra gâ ye kɔ də nə kɔ

8. (16.1-4) Kə ko ərə kə alayïəyo

9. (16.5-12) Palɔ zâ ama gâ ye ndə kə pa tshə ro də ana

10. (16.13-24) Aəpʉ ə̂në Palɔ mʉ̂ də əpʉ kə bla ətshe