2 ቆሮንቶሳ 6

1ዋኔ ዎታ ራቶ ኦፈላኖ ላኖካንክ ማለ እስን ታአታቴታን ስኖ ታዋ ላኦ ካላይክ ጎጎየሎንኮ ኖ እስኑን ሀዳራ አማና። 2ዋ፦

“ልክኪ ጎራታይ አን ኩ ማለ!

ታፋይና አሪ አን ኩ ጋርጋሬ!” ማንኮአማሮ ማራን፥

ሂክማ ካኤካተ ጎራታ ሂካያ፤ ታፋይና አሪ ግዳታ።

ጳዉሎሳና ስላሰ ታአታቴራን ራኮ

3ሀንዳኖካን ጎጎቱፋሞንኮ ማዮና ሀንዱዱፎ ላኮሌኖ። 4ሀሌዎ ኳሬ ኦፈላኖ ፈሎ ዱባ እስኦታን ዋዉን ኦሀንዳኖ ኣን ስሳታና፤ ኦብስ ታሞጋን፥ ራኮይ፥ ቃራይ፥ ያዳይ፥ 5ቦጫማኖይ፥ ሻማኖይ፥ ኦኮይ፥ ፈሎ ጂናኒ፥ ሁዱሮ ዋቲ፥ ኡአኖዪ፥ 6ሙጭአማኖይ፥ ማላባኖይ፥ ኦብሲ፥ ኢዳነ፥ አያና ቁሉክ፥ ጌላንጀ ታሩምት፥ 7ሃፉራ ካሩምቲ፥ ሁና ካዋይ፥ ገነ ታመርግይና ገነ ታበቴይ ቁሉክ ሁ ካጀረነ አባይኔ፥ 8ካባጃዪና ጎርቱን የራን፥ ሶማሳማኖይና ሀባራማኖይ፥ ግርነና፥ አንዴ ኦሩሚ ሌነ ግራን ጣራሜሳ አማምነና። 9ኦአዴሳምነ ሌነ ግራን ካአዴሳሞንግሮ ኣን ሌነና፥ ጎዬራን አማ ግራን አደ ኔፎነ ግና፥ ጎቦጫምነና ላኮጎነኖ፥ 10ኖ ኦጋዳኖ ሌነ ግራን አርጌቶ ኦገጌላታኖና፤ ህየሳ ሌነ ግራን ኦሞጋን ዱረሳ የላና፤ ኮና ካላይክ ሌነ ግራን ዱባና ካካንያ።

11እስን ካቆሮንቶሳ እባዶ፥ ዱባ እስኑን አዴስንሰ ሰግነና፤ ዎዳናታን ባላአሳነ እስኑን ባናነና። 12ጌላንጀትስን ኦትራቴታን እስንታን ኳሬ ኖ ጌላንጀታን ላኮትራነኖ። 13ይስኬ ማንኮሌተን ማራን ሂካ አን እስን ሻድሳራ፤ እስና ኖ ዎዳናታን ጎጎባናነኖ ማለ ዎዳናትስን ባላአሳዬን ባናዬን።

ዋ ካአማኖን እባዶ ዎታ አሮሌተን

14ዋ ካአማኖን እባዶነ ዎታ ካዶትሶን ራድ አሮቁራናንተን፤ ቁሉማ ሜላነ ዎታ መ ኤሴላ አብታ? እፋ ሙጉድነ ዎታ መ ኤሴላ አባ? 15ክርስቶሳ ዱርሳነ ዎታ መ ኤሴላ አባ? ካአማናራ ካአማኖን ዎታ መ ኤሴላ አባ? 16ምን ካዋ ምን ካቶልቻ ዎታ መ ኤሴላ አባ? ኖ አርዶክ ቁሉክ ምን ካዋና፤ ዋ ሃ አመ አዬሰራ፤ “እሶነ ዎታ ግርናራ፥ እሶ ኦሮ ሰሴይናራ፤ ዋክሶ ልናራ፤ እሶና ጎሳኬ ልናራን።” 17“ሃንሱን እሶ ኦሮኮ ብያ እዬን ዎዩ ላ፤ አማራ ጎታ ባቲክ አየስ አሮድንቴን፤

“አንና እሶ አታይናራ፤ 18አን ኦዶክሶ ልናራ፤

እስና ባባርና ዴሌልና ይስኬ ልናታን።

አማራ ዱባ ካዳንዳራ ሄዶ።”