1 ተሰሎንቄ 1

1ጳዉሎሳኮ፥ ስላሰኮና ጢሞቶሳኮ፤ ካዋ ኦዶይና ጎታ የሱሳ ክርስቶሳ ኦግራዉና ካተሰሎንቄ ካታማይ ካግሮ ምን ካዋዉን፤ ዋ ኦዶካን ታጎታ የሱሳ ክርስቶሳኮ ስኖና ኖጎዳ እስኑን ሀሌቶ።1

ካተሰሎንቄ እባዶኮክ ግርና አማኖ

2ኤብካን እስን ሻዳ አርጌቶ እስን ዱባ ማራን ዋ ጋላታና። 3አማኖኮ ኦሌራን ፈሎኦትስን፥ ጌላንጀኮ ካኬሮ ዳፉርክስን ጎታካን የሱሳ ክርስቶሳ ካአብታን አማኖ ካሄላመሮ አታንክስን ሄዶካንና ኣቦካን ኖ አርጌቶ ሻዳና። 4ዋይ ኦጌላንቴታን አቢላልቴ፥ ኡሱ እስን አሳባኖ ካንሶዋ፤ 5ኣላንቲና ዎንጋላካን እስን ቶስ ካኤመተራ ሁናይና አያና ቁሉክ ካሞጋን ማላባኖይ ኳሬ ሃፉራ ካላሊ ላኮዮ። አደ እስን ማራን አምነኔ እስን ኦሮ ኖ ምሲ ግኔ ካሳንዋ። 6እስን ኖ ኣንና ጎታ ኣን ሌቴታን፤ ማምሲና ታአቲ ራኮ ጎጌተና ሃፉራ ካዋ አያና ቁሉክ ገጌሎይ አታቴታን።2 7ሂካኮና ካከይ ታመቀዶንያይና ታአካያ አዉራጃይ ካግሮ አማኒሉን ታኢዳንት ማሱሳ ሌቴታን። 8ካጎታ ሃፉራ እስንኮ ቤረ ታመቀዶንያይና ታአካያይ አዉራጃይ ማላሳማኖ ካላ አንሌኖን ግራን እስን ዋይ ካአብታን አማኖ ባንኤ ዱባ አዴሳመራ፤ ሃንሱን ኖ ህታ ሃጃ ጉት ኮና አዬስን ላኮዶትሳሮ፤ 9ምስክ አታታኖይ አታቴታን አርዶክና ካሩም ካሌሮ ሄዶን ሀንዳይን ቶልቻልኮ ዋ ቶስ ምሲ አባባቴታን እሶ መተክሶዉን አዬሳራን፤ 10አደና ዋ ጎይኮ ካኬሰሮና ዳሩርኮ ካኤሜይናሮ ኤረኬሳ፥ ታኤማቶ ኤንገኮ ካሃስናሮ የሱሳ እስን ምሲ ኦራይናታን እሶ አዬሳራን።