Godɨn Eghaghanim: Akar Gavgavir Dɨkɨrɨzir Ghurim ko Igiam
Onger Akaba 125
God uan gumazamizibagh amizɨ, me deragha apia
Godɨn Dɨpenimɨn ghuavanaga an ziam fer ighiam.
Gumazamizir nɨghnɨzir gavgavim Ikiavɨra Itir Godɨn itiba,
me Saionɨn Mɨghsɨamɨn mɨn iti.
Mɨghsɨar kam bar gavgavigha
mozoroziba puvatɨ,
a ikɨ kamaghɨra ikiam. 1
Kamaghɨra, mɨghsɨaba Jerusalemɨn nguibam ekɨaruzɨ moghɨn,
datɨrɨghɨn ko gɨn Ikiavɨra Itir God,
uan gumazamiziba ekɨarugh men ganam.
Gumazir arazir kurabagh amiba,
Godɨn gumazamizibar nguazim gativagh zurara men ganan kogham.
Me kamagh damutɨ,
Godɨn gumazamiziba uaghan arazir kurabar amuam.
O, Ikiavɨra Itir God, gumazamizir nɨ baghavɨra ikia nɨn akamɨn gɨn zuiba,
nɨ deraghvɨra me damu.
Nɨ gumazir kurabagh asɨghasɨgh,
egh gumazir ifara uan nɨghnɨzibar gɨn zuiba sarama asɨghasɨkigh.
Eghtɨ Israelia deraghvɨra ikiam.
Source notes (1)
- Cross-reference Onger Akaba 121:8; Sekaraia 2:5
Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.