Godɨn Eghaghanim: Akar Gavgavir Dɨkɨrɨzir Ghurim ko Igiam
Onger Akaba 11
Gumazim nɨghnɨzir gavgavim Godɨn iti
Devit onger akar kam osiri.
An onger akabar faragha zuir gumazim gɨnɨghnɨgha, onger akar kam osiri.
Kɨ nɨghnɨzir gavgavim Ikiavɨra Itir Godɨn ikia kamaghɨn fo, a na geghuva nan gari.
Nɨ ti onganigh kamagh na mɨkɨm suam,
“Nɨ kuarazimɨn mɨn mɨghegh mɨghsɨamɨn mavanang.” 2
Guizbangɨra, gumazir kuraba uan barir pibagh afegha gɨfa.
Me amɨnirbɨrimɨn uan baribar gumazir aghuibagh asasava ami. 3
Gumazamiziba arazir aghuiba ateghtɨ biziba bar ikuvightɨ,
gumazir arazir aghuibar gɨn zuim manmaghɨra damuam? 4
Ikiavɨra Itir God uan Dɨpenimɨn aven ikiavɨra iti.
A uan Nguibamɨn atrivimɨn ikiavɨra iti,
egha gumazamiziba amir biziba a bar moghɨra dar gara da tuisɨsi. 5
Ikiavɨra Itir God, a gumazamizir aghuiba ko kuraba uaghara men araziba tuisɨgha men gari.
Egha gumazir mɨsoghasa ifongeziba,
a uan navir averiamɨn aven bar men aghua. 6
An avir bar puvɨra isia feim gumazir kurabagh inge.
Kar a men ivezir kuram ikarvazima,
men mɨkarziba bar puvɨra men feima me mɨzazir kuram isi. 7
Guizbangɨra, Ikiavɨra Itir God arazir aghuibagh ami.
A uabɨ arazir aghuim bar a gifonge.
Gumazamiziba an akam baragh an gɨn mangɨva,
an guamɨn ganam.
Source notes (7)
- Cross-reference Onger Akaba 2:12; 121:1
- Cross-reference Onger Akaba 37:14; 64:3-4
- Cross-reference Onger Akaba 87:1; 119:152
- Cross-reference Maika 1:2; Matyu 23:16-22
- Cross-reference Jenesis 22:1; Jems 1:12
- Cross-reference Onger Akaba 75:8; Jeremaia 4:11-12; Esekiel 38:22
- Cross-reference Onger Akaba 7:9-11; 16:11; 33:5
Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.