Godɨn Eghaghanim: Akar Gavgavir Dɨkɨrɨzir Ghurim ko Igiam
Aisaia 53
Ezɨ gumazamiziba akam ikaragha ghaze,
“Tinara datɨrɨghɨn, e orazir akaba nɨghnɨzir gavgavim adar iti?
Terara, Ikiavɨra Itir God, uan ingangarir gavgaviba isa men akazɨ,
me dar gani? 2
Guizbangɨra, Ekiam uan ingangarir gumazim ataghizɨ,
a mati temer mam nguazir mɨsɨngizimɨn oto.
Ingangarir gumazir kam, an ganganim tong en damazibar derazir puvatɨ,
kamaghɨn amizɨ, a ziaba puvatɨ.
Ezɨ bizir aghuitam an itir puvatɨ, eghtɨ e an ganɨva a gakongam. 3
Ezɨ gumazamiziba akɨrim ragha a gasaragha, pazavɨra a gamua bar a gifongezir puvatɨ.
Ezɨ mɨzaziba ko osɨmtɨzir avɨriba a gizɨfa.
Gumazamiziba an ganan aghuagha, uan guaba monge.
Egha akɨrim ragha bar a gasara.
Ezɨ e an gara ghaze,
a pura gumazir kɨnim. 4
“E nɨghnɨgha ghaze,
God ti ivezir kuram a ganɨga, a mɨsogha osɨmtɨzir kabagh amizɨ, da a batifi.
Ezɨ puvatɨ.
Ingangarir gumazir kam, e bagha en osɨmtɨziba ko mɨzaziba isa da ateri. 5
Ezɨ en akaba batozir arazim bagha, me an ekianim bɨra.
Arazir kurar e amiba bangɨn, me a dɨkabɨragha a gasɨghasɨki.
Egha me puv a mɨsozima an mɨkarzim tintinibar bɨaghire,
mɨzazir a inizir kam e gamizɨ, e ghuamaghegha ua deragha bar deravɨra iti. 6
Guizbangɨra, e bar moghɨra sipsipbar mɨn tintinibar arua,
vaghvagha uan ifongiabar gɨn arui.
Ezɨ Ikiavɨra Itir God, en arazir kuraba ikarvaghsɨ pazavɨram e damuan fɨrɨn,
a kamaghɨn amizir puvatɨ.
A uan ingangarir gumazim gamizɨ,
a en danganim inizɨ, e iniamin mɨzaziba, an ada isa a ganɨngi.” 78
Gumaziba ingangarir gumazir kam pazav a gami,
ezɨ a uabɨ dɨkabɨra mɨzazir kuram ini.
Egha mɨgɨrɨgɨar tam gamizir puvatɨ.
A mati sipsipɨn nguzim uan akam dukuazɨ,
me a mɨsueghtɨ an aremeghasa a inigha zui.
Egha uaghan mati sipsip me an arɨziba aghorasava amima,
a bizitam mɨgeir puvatɨ.9
Ezɨ me guizɨn arazim oteghavkɨnigha, puram a isa kalabus gatɨgha, a inigha kotɨn ghu,
ezɨ kot a mɨgɨa ghaze, an aremegham.
Ezɨ me a mɨsoghezɨ an areme.
Egha an adarazir tav kamaghɨn nɨghnɨgha fozir puvatɨ,
a men danganim inigha mɨzazir me uari iniamin an a ini,
egha en arazir kuraba gɨn amangasa areme.10 11
Ezɨ me an kuam isa gumazir arazir kurabagh amiba ko, dagɨar avɨriba itir gumaziba ko anefa.
Ezɨ e fo, a uabɨ arazir kuratam gamizir puvatɨ,
egha a uaghan ifavarir akatam mɨkemezir puvatɨ. 12
Ezɨ Ikiavɨra Itir God, uabɨ uan ifongiamɨn gɨn ghua
uan ingangarir gumazir kam dɨkabɨragha a gamizɨ, a mɨzazim isi.
A fo, ingangarir gumazim gumazamizibar arazir kuraba gɨn amangɨsɨ,
osɨmtɨziba agɨvamin ofan mɨn uan mɨkarzim anightɨ, an ikɨrɨmɨrim bar ruaraghtɨ, a uan ovavir boribar ganam.
Egh ingangarir an amim, Ikiavɨra Itir God ingarasa ifongezir araziba, a dar amuam.
Egh a bizir kabar amutɨ, da deraghvɨram otivam. 13
Ezɨ osɨmtɨzir ekiar an aterezir kamɨn gɨn, a bizir bar aghuibar gantɨ da otivam,
eghtɨ a bar akuegham.
Ezɨ Ikiavɨra Itir God kamaghɨn mɨgei,
“Nan ingangarir gumazir nan damazimɨn derazir kam, a deraghavɨra na gɨfo.
Egha a gumazamizir avɨribar arazir kuraba ateri,
egh arazir kamɨn a me damutɨ, me nan damazimɨn derazir gumazamizibar otivigham. 14
“Kamaghɨn amizɨ, gumazamiziba an gari, a mati gumazir kuram.
Egha a gumazamizir avɨrimɨn arazir kurabar osɨmtɨziba atera, uabɨ isa me bagha areme.15
Egha a gumazamizir arazir kurabagh amibar akurvaghasa God ko mɨgei.
Kamaghɨn amizɨ, kɨ gumazir gavgavir bar ekiaba itibar tongɨn, ziar ekiam a danɨngam.
Egh mati mɨdorozir gumazir gavgaviba, uan apaniba dɨkabɨragha men bizir aghuariba inigha,
da tuisɨgha uan adarazigh anɨngizɨ moghɨn,
kɨ bizir aghuiba isɨ a danɨngam.”16
Source notes (16)
- Cross-reference Jon 12:38; Rom 10:16
- Cross-reference Aisaia 11:1; 52:14
- Cross-reference Matyu 27:30-31
- Cross-reference Matyu 8:17; 1 Pita 2:24
- Cross-reference Rom 4:25; 1 Korin 15:3; Hibru 5:8; 1 Pita 2:24
- Cross-reference Aisaia 53:11; Aposel 13:38-39; Rom 5:15; 5:18; 1 Pita 2:25
- Cross-reference Matyu 26:62-63; Mak 15:3-5; Luk 23:9; Jon 19:9; Akar Mogomem 5:6
- Cross-reference Aposel 8:32-33
- Footnote Fofozir gumaziba deragha fozir puvatɨ, tinara akar ves 7-9ɨn itimɨn mɨkeme. Marazi ghaze, Ikiavɨra Itir God mɨkeme. Ezɨ marazi ghaze, gumazamiziba mɨkeme. Ezɨ marazi ghaze, kar Godɨn akam inigha izir gumazimɨn akam.
- Footnote Hibrun akam deragha ves 8ɨn akar avɨrir mabar mɨngariba abɨghizir puvatɨ.
- Cross-reference Matyu 27:57-60; 1 Pita 2:22
- Cross-reference Onger Akaba 22:30; Jon 1:29
- Cross-reference Aposel 13:38-39; Rom 5:15; 5:18
- Cross-reference Aisaia 50:6; Mak 15:28; Luk 22:37; 23:34; Rom 3:25
- Footnote Akar faraghavɨra 53:12ɨn itim, gumazir maba ghaze, e kamaghɨn a giragham, “A gumazamizir arazir kurabagh amibar danganim inigha me iniamin osɨmtɨzim an a ini.”
- Footnote Ves 53:12, an akar namba 2, gumazir maba ghaze, e kamaghɨn a giragham, “Kamaghɨn amizɨ, kɨ gumazamizir kaba isɨ a danɨngam, mati bizir a mɨdorozim gafiragha iniziba. Egh a dagh ativagh dar ganam.”
Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.