Mateu 10

Doisprãdzatslji sh-Misiunea a lor

1Atumtsea Isusul lã acljimã di doisprãdzatsi ucenitsilji a lui ningã nãsu, sh-lã deadi autoritati s-li aĝuneascã duhurili atseali nicuarati, shi s-vindicã itsi lãngoari sh-itsi niputeari. 2Aesti suntu numili a doisprãdzatsi apostulji: protlu Simonul acljimat Petru, shi Andrea, fratili a lui, Iacovul hiljiu al Zebedeu, shi Ioanul, fratili a lui, 3Filipul sh-Bartolomeu, Toma sh-Mateu taxidarlu, Iacovul hiljiu al Alfeu, sh-Tadeul, 4Simon Cananeanlu, sh-Iuda Iscariotul atsel tsi deapoea lu prideadi.

5Aeshti suntu di doisprãdzatslji tsi Isusul lji pitricu sh-lã ordinã dzãcãnda: “Nu vã dutsets cãtrã pãngãnjlji sh-nu intrats tu vãrã cãsãbã di-a Samaritenjilor. 6Ma dutsets-vã ma ghini la oili atseali chiruti di la casa al Israel. 7Dutsets-vã sh-predicats, dzãcãnda: ‘Amirãriljea a tserurilor s-apruche.’ 8Vindicats lãndzitslji, curats leproshlji, nyeats mortsãlji, aĝunits demonjlji. Ca doarã loatã, ca doarã s-dats. 9Nu adunats furii, nitsi asimi, nitsi bãcãr tu punga a voastrã, 10nitsi trastu ti cali, nitsi doauã pãreclji di tunicã, nitsi sandali, nitsi ciumagã, cã lucrutorlu easti axiu ti hranea a lui. 11Tu cathi cãsãbã icã hoarã tsi s-intrats, ntribats macã ari aclo vãrã om axiu, shi shãdets aclo pãnã-cãndu s-vã nchisits. 12Shi cãndu s-intrats tu casã, salutats-lji. 13Sh-macã atsea casã easti axiu, va yinã pacea a voastrã pri ea, iarã macã nu easti axiu, pacea a voastrã va s-toarnã nãpoi la voi. 14Sh-macã vãrã nu vã ashteaptã, sh-nu lã ascultã zboarili a voastri, ishinda di atsea casã icã di atsel cãsãbã, scuturats puhlu di cicioarili a voastri. 15Dealihea ma vã dzãc cã tu dzua a giudicatãljei loclu a Sodomiljei sh-a Gomoriljei va hibã cu ma multã lishureatsã di atsel cãsãbã.

16Ia, mini ma vã-pitrec ca oili tu mesea a luchilor. S-hits mintimenji ca nãpãrtitsli sh-curats ca purunghilji. 17Afiritsi-vã di oaminjlji cã va vã prida nãintea a sinedriului a lor, sh-va vã batã tu sinagodzãli a lor. 18Sh-va vã ducã nãintea a guvernatorilor sh-nãintea a amiradzlor trã itia a mea, tra s-mãrtirsits nãintea a lor sh-a pãngãnjilor. 19Sh-cãndu s-vã prida tu mãnjili a lor, nu vã minduits cã tsi va grits, cã tu atsea oarã va vã si-da atsea tsi prindi s-dzãtsets. 20Cã nu va s-hits voi tsi grits, ma Duhlu a Tatãlui a vostru tsi va greascã trã voi. 21Tora fratili va prida fratili la moarti, sh-tatili hiljiu a lui, cilimenjlji va si scoalã contra a pãrintsãlor, sh-va lji vatãmã. 22Sh-tuts va vã aurascã trã numa mea, ma atsel tsi va aravdã pãnã tu soni va ascapã. 23Cãndu s-vã aĝuneascã tu un cãsãbã, fudzits tu un altã, cã dealihea vã dzãc, cã nu va s-bitisits tricãnda cãsãbadzli a Israelui ma nãinti tsi s-yinã Hiljiu a Omlui.

24Uceniclu nu easi prisupru di nvitsãtorlu a lui, nitsi huzmichearlu prisupru di nicuchirlu a lui. 25Lj-agiundzi a uceniclui s-facã ca nvitsãtorlu a lui, sh-a huzmichearlui ca nicuchirlu a lui. Macã nicuchirlu a casiljei lu acljimarã Belzebub, ahãntu ma multu va s-lji acljeamã ashã atselji a casiljei a lui!

26S-nu avets fricã, cã nu ari tsiva anvãlitã tsi nu s-dizvãleascã, sh-vãrã tsiva ascumtu tsi nu va s-facã cunuscutã. 27Atsea tsi mini vã dzãc tu scutidi, dzãtsets-u tu lunjinã, sh-atsea tsi avdzãts cu ureclji, predicats-u pri citii. 28Sh-nu vã aspãrats di atselji tsi vatãmã truplu, cã nu pot s-vatãmã suflitul. S-vã aspãratsã ma multu di atsel tsi poati s-vã chearã suflitlu sh-truplu tu Colasi. 29Nu s-vindu vahi doi harabelji ti un aspru? Cu tut atsea vãrã di elji nu cadi mpadi fãrã di vrearea a Tatãlui a vostru. 30Ma a voauã sh-perlji dit capã vã suntu numirati. 31S-nu avets fricã! Voi custusits ma multu di multsã harabelji.

32Trã atsea, caitsido tsi va mãrtirseascã ti mini nãintea a oaminjlor, sh-mini va mãrtirsescu nãintea a Tatãlui a meu, tsi easti tu tseruri. 33Ma caitsido tsi va mi aleapid nãintea a oaminjlor, sh-mini va lu aleapid nãintea a Tatãlui a meu tsi easti tu tseruri. 34S-nu vã minduits cã mini am vinit s-aducã pacea pri loc. Nu vinj s-aducã pacea, ma spata. 35Cã mini vinj s-dispartu hiljiu di tatãl, hiljea di muma, sh-nveasta di soacra, 36sh-neamitsilji a Omlui va hibã atselji dit casa a lui.

37Atsel tsi va tatãl, icã muma ma multu dicãt mini, nu easti axiu trã mini. Sh-atsel tsi va hiljiu icã hiljea ma multu dicãt mini, nu easti axiu trã mini. 38Sh-atsel tsi nu ljea crutsea a lui sh-nu yini dupã mini, nu easti axiu trã mini. 39Cai va s-tsãnã bana a lui va u-chearã, ma atsel tsi va u-chearã trã mini va u-aflã.

40Atsel tsi vã aproachi, mi aproachi mini, sh-atsel tsi mi aproachi mini, aproachi atsel tsi mi ari pitricut. 41Atsel tsi aproachi un prufit tu numa a prufitlui, va ljea arãsplata a prufitlui. Sh-atsel tsi aproachi ndreptul tu numa a ndreptului, va ljea arãsplata a ndreptului. 42Sh-caitsido tsi lj-da ti beari un putir di apã aratsi a vãrui di aeshti njitsi, tu numa a unui ucenic, dealihea vã dzãc cã elu nu va chearã pute arãsplata a lui.”