तिताले पत्र 3

ख्रिस्ती जिवन

1त्यासनी सत्ताधिश अनी अधिकारी यासनासंगे ऱ्हावानं, त्याना आज्ञा पाळान्या प्रत्येक चांगला काममा पुढे ऱ्हावानं. 2कोणी बी निंदा करानी नही, भांडखोरपना नही करता नम्र अनी सर्व माणसस संगे सर्व प्रकारतीन नम्रतातीन वागनारा ऱ्हावाले पाहिजे. अशी त्यासले याद करी दे. 3कारण आपण बी पहिले बिनबुध्दीना, आज्ञा नही माननारा, भटकेल, येगयेगळा प्रकारना वासनामा अनी सुखविलासमा आटकेल, दुष्टपण अनी हेवा यानामा आयुष्य घालनारा व्देषपात्र अनी दुसरासना व्देष करनारा व्हतुत. 4पण जवय आपला तारणारा देव ह्यानी दया अनी माणुस वरनी प्रिती प्रकट व्हयनी, 5तवय त्यानी आमनं तारण करं, तर हाई चांगला कामसघाई नही तर जे आम्हीन स्वतः करं, 6त्यानी तो पवित्र आत्मा आपला येशु ख्रिस्त याना कडतीन आपलावर विपुलतानी वतेल शे. 7यानाकरता की आपण त्याना कृपातीन नितिमान ठरसुत, आशा धरेल प्रमाणे सार्वकालिक जिवन मिळवणारा बनसुत.

8हाई वचन ईश्वासनीय शे, अनी तु ह्या गोष्टिसबद्दल खात्रीतिन सांगस व्हशी, अशी मनी ईच्छा शे यानाकरता की देववर ज्यानी ईश्वास ठेयेल शे त्यानी चांगला कामे करानं मनवर लेवानं ह्या गोष्टी मनुष्यसकरता चांगल्या अनी हितकारक शेतस. 9पण मुर्खपणतीन वाद, वंशावळ, कलह, अनी नियमाशास्त्र बद्दलना भांडण, ह्यापाईन दुर ऱ्हाय कारण ते व्यर्थ अनी निरूपयोगी शेतस. 10फुट पाडणारा माणुसले एकदाव, दोनदाव सांगीसन सोडी दे. 11असा माणुस बिघडेल शे, अनी तो स्वतः कृतीघाई दोषी ठरायेल शे तरी तो पाप करत ऱ्हास, हाई तुले माहित शे.

शेवटनी सुचना

121

मी अर्तमाले अनी तुखिकले तुनाकडे धाडावर व्हई तितलं करीसन मनाकडे निकपलिसले निंघी ये, कारण मी हिवाळामा तठे थांबानं ठरायेल शे. 132जेना शास्त्री अनी अपुल्लो यासले काहीच कमी पडाव नही, असा तयारीतीन शक्य तितला लवकर धाडी दे, 14आपला लोकसले आपला अगत्यना गरजा मिळाले पाहिजे म्हणीसन, येळ काढीसन चांगला कामे करानं बी शिकानं, म्हणजे त्यासनी बेकारनं जिवन जगाले नको. 15मनासंगे सर्वाजन तुले सलाम सांगतस आमनावर प्रिती करनारा सर्व ईश्वासणारासले सलाम सांग, देवनी कृपा तुमना सर्वासंगे राहो.