गणना 5

अशुध्द व्हयेल माणसंसले बाहेर काढनं

1परमेश्वर मोशेले बोलना. 2इस्राएल लोकेसले आशे आज्ञा कर; प्रत्येक महारोगी, प्रत्येक स्रावी अनी मरामुये अशुध्द व्हयेल प्रत्येकले छावणीनी बाहेर काढी टाकानं; 3मंग तो माणुस ऱ्हावो का बाई ऱ्हावो; त्या बठासले छावणीना बाहेर काढी टाकानं, त्यासनामुये तुमना छावणीसना अशुध्द व्हवाले नही पाहीजे; कारण तठे मना निवास शे. 4इस्राएल लोकेसनी त्याप्रमानं करं; त्या बठासले छावणीना बाहेर काढी टाकं; परमेश्वरनी मोशेले सांगेल व्हतं त्याप्रमानं त्यासनी करं.

अपराधबद्ल व्हणारी शिक्षा

5परमेश्वर मोशेले बोलना; 6इस्राएल लोकेसले आशे सांग; जर एखादा माणुसनी नाहिते बाईनी एखादं पाप करीसनी परमेश्वरनीसंगे विश्वासघात करी तर तो दोषी ठरी. 7तर त्यासनी करेल पाप आपला आंगवर लेवानं; ज्याना त्यासनी आपराध करेल व्हई त्याना आपराधबद्दल बठी भरपाई देईसनी त्यामा आजुन पाचवा हिस्सानं भर देवानी. 8पण आपराधना बदला लेवाकरता त्या माणुसना कोनी वारीस नही व्हई ते त्या आपराधनाबद्द्ल परमेश्वरले देवानं हिस्सा याजकनं व्हवाले पाहिजे; जे प्रायश्चितनं मेंढा त्यासना प्रायश्चितकरता अर्पण व्हई त्याना आजुन हाई येगळा हिस्सा शे. 9इस्राएल लोकसनी ज्या पवित्र वस्तु समर्पन करेल शेतस त्यानं अंश म्हणीसनी याजकनाजोडे आणतस ते‍ त्यानाच शे. 10प्रत्येक माणुसनी पवित्र करेल वस्तु हया याजकन्या शेतस; याजकले जे काही दिधं त्या बठा याजकनाच शेतस.

व्यभिचारना पारख

11परमेश्वर मोशेले बोलना; 12इस्राएल लोकेसले सांग; जर एखादा माणुसना बाईना पाय वाकडं पडनं व्हईते तिनी त्यानासंगे विश्वासघात करेल शे. 13अनी एखादा माणुसनी तिनासंगे वाईट काम करेल व्हई; अनी हाई गोट नवरापाईन दपाडेल व्हई, अनी भ्रष्ट व्हयनी तरी तिनाविरुध्द कोनी साक्षीदार नही व्हई अनी वाईट कामना येळेले तिले कोणी धरेल नही व्हई. 14जर नवराले बायकोवर शक व्हई जास कारण तिनी स्वताले अशुध्द करेल शे तर नवरा आपली बायकोवर शक कराले लागस जसं की बायकोवर शक व्हई जास, जश की बायकोनी स्वताले अशुध्द करात पन नही. 15तर त्या माणुसनी आपली बायकोले याजकजोडे लई जावानं अनी तिनाकरता एक दशमांश एफा1 जवनं अर्पण करानं, त्यानी त्यानावर तेल टाकानं नही अनी धुप ठेवानं नही, कारण शकमुये व्हयेल म्हणजे अधर्मले आठवन देनारा हाई अन्नर्पण शे, 16मंग याजकनी त्या बाईले परमेश्वरनामोरे उभं करानं; 17अनी याजकनी मातीना भांडामा पवित्र पाणी लेवानं अनी निवासमंडपना जमीनना जरासी धुळ लिसनी त्यामा टाकानं; 18मंग याजकनी त्या बाईले परमेश्वरनामोरे उभं करीसनी तिना डोकानं केस सोडानं अनी शकनं आठवन देनारा अन्नर्पण तिना हातवर ठेवानं अनी शापनं कडू पाणी याजकनी त्याना हातवर लेवानं; 19मंग याजकनी त्या बाईले शपथ लिसन सांगानं, एखादा माणुसनी तुनासंगे वाईट काम नही करेल व्हई अनी तू आपला नवराले सोडीसन दुसराकडे जाईसनी भ्रष्ट नही व्हयनी व्हई तर तु हाई शापनं कडू पाणीनं परिनामपाईन मुक्त ऱ्हाय; 20पण तु तुना नवराले सोडीसनी दुसराकडे जाईसनी भ्रष्ट व्हयनी व्हई अनी तुना नवराले सोडिसनी दुसरा माणसुनीसंगे संबंध करेल शे तर, 21मंग याजकनी शापजनक शपथ तिले लेवाले सांगानं अनी तिले सांगानं, परमेश्वर तुनं मांडीले सडाई अनं तुनं पोटले सुजाडी, परमेश्वर तुले लोकेसना शापले अनी तिरस्कारले पात्र करी. 22म्हणजे हाई शापजनक जल तुन्या आतडयासमां जाईसनी त्यानं तुना गर्भ खराब व्हई अनी तुनी मांडी सडी; यावरतीन त्या बाईनी आमेन, आमेन आशे म्हणानं. 23मंग याजकनी हाई शापशब्द पुस्तकमा लिखीसन ते कडू पानीघाई धोई टाकानं. 24अनी ते शापजनक कडू पानी त्या बाईले पेवाडी देवानं; अनी ते त्या बाईनं पोटमां जाईसनी कडूपना निर्माण करी. 25अनी याजकनी ते शकनं अन्नार्पण बाईनं हातमाईन लिसनी परमेश्वरनामोरे ओवाळीसनी अनी वेदिनाजोडे लई जावानं. 26मंग याजकनी ते अन्नार्पण माईन आठवन म्हणीसनी मुठभर लिसनं त्यानं वेदीवर होम करानं अनी त्यानंतर बाईले ते पाणी पाजानं. 27त्यानी ते पाणी तिले पाज म्हणजे आशे व्हई जर ती भ्रष्ट व्हयेल व्हई अनी तिनी तिना नवरानंसंगे विश्वासघात करेल व्हई तर ते शापजनक पाणी तिनामा जाईसनी कडूपना लई, तिनं गर्भ खराब व्हई, तिनी मांडी सडी अनी तिना लोकासमा तिनं नाव शापदर्शक व्हई; 28पण ती बाई भ्रष्ट नही व्हयेल व्हयी तर ती शुध्द व्हयी अनी ती मुक्त व्हयी जाई अनी गर्भधारनले पात्र व्हयी. 29बाईनी आपला नवराले सोडीसनी परका माणुसनीसंगे जाईसनी अशुध्द व्हयेल शे तवय ते शकनं हाईच नियम शे; 30एखादा माणुसले शक व्हई आपली बायकोना बारामा शक तयार व्हयनं तर त्यानी त्या बाईले परमेश्वरनामोरे लई जावानं अनी वर सांगेल नियमप्रमानं याजकनी त्याबारामा सर्वाकाही करानं. 31मंग तो माणुस अधर्मपाईन मुक्त व्हई अनी त्या बाईले तिना वाईट कामनं फळ तिले भेटी.