अनुवाद 30

परत एकवट व्हईन आशिर्वाद प्राप्त करानं अटी

1मी तुनापुढे मांडेल ह्या सर्वा गोष्टी म्हणजे ह्या आशिर्वाद अनं शाप जवय तुनावर येतीन, अनी तुना देव यहोवा तुले ज्या ज्या राष्ट्रसमा हाकली दि तठे तू ह्या गोष्टीसना आठवण करशी. 2अनी जवय तू आपला पोऱ्यासोऱ्यासंगे पुरा मनतीन अनं पुरा जिवतीन आपला देव यहोवा यानाकडे वळशी अनी जे काही आज मी तुले सांगेल शे त्याप्रमाणे त्यानी वाणी ऐकशी. 3तवय तुना देव यहोवा तुनी गुलामगीरी दूर करी अनी तुनावर दया करीसन ज्या ज्या राष्ट्रसमा त्यानी तुनी पांगापांग करेल व्हई तठेन तुले तो परत एकजागे आणी. 4तुना पळी जायेल लोके मंग त्या कितलाबी दूर जायेल व्हतीन तरी तठेन तुना देव यहोवा तुले एकत्र करीसन आणी. 5तुना पुर्वज ज्या देशना वतनदार व्हतात त्यामा तुना देव यहोवा तुले आणी अनी तू त्या देशना वतनदार बनशी; तो तुना पुर्वजसपेक्षा तुनं जास्त कल्याण करी अनी तुले जास्त बहुगुणित करी. 6तुना देव यहोवा तुना हृदयनी अनं तुना वंशजसना हृदयनी सुंता करी, अनी आपण जिवत ऱ्हावाले पाहिजे म्हणीन तू आपला देव यहोवा यानावर पुरा मनतीन पुरा जिवतीन प्रेम करशी. 7पण ह्या सर्वा शाप तुना देव यहोवा तुना छळ करनारा शत्रुसवर अनं दे्वष्टसवर आणी. 8तू तर परत परमेश्वरनी वाणी ऐकशी अनी ज्या आज्ञा मी आज तुले दि ऱ्हायनु‍ शे त्या सर्वा पाळशी. 9तुना देव यहोवा तुना कल्याणकरता तुना हातना सर्वा काम, तुना पोटना फळ, तुना गुरंढोरंसना पिल्लं अनं तुनी भूमीना उपज ह्याबाबत तुनी समृध्दी करी; परमेश्वर जशा तुना पुर्वजसवर प्रसन्न व्हता तशा तुना कल्याणकरता तुनावरबी परत प्रसन्न व्हई; 10तू आपला देव यहोवा यानी वाणी ऐकीन ह्या नियमशास्त्रना ग्रंथमा लिखेल त्याना आज्ञा अनं विधी पाळात अनी आपला देव यहोवा यानाकडे आपला पुरा मनतीन अनं पुरा जिवतीन वळनास तर अश व्हई.

11हाई जी आज्ञा मी आज तुले दि ऱ्हायनु शे ती तुले अवघड नही, ना ती तुनापाईन दूर शे. 12ती स्वर्गमा नही; आम्हीन ती पाळाले पाहीजे म्हणीसन आमनाकरता स्वर्गमा कोण चढी जाईसन ती आमनाकरता आणी अनं ती आमले ऐकाडी अश तुले सांगानी गरज पडावू नही. 13ती समुद्रनापलीकडे नही; आम्हीन ती पाळाले पाहीजे म्हणीसन समुद्रना त्या बाजुले जाईसन आमनाकरता ती कोण आणी अनं आमले ती आयकाडी अश तुले सांगानी गरज पडावू नही. 14हाई वचन तर तुना अगदी जोडे शे, म्हणजे तुना तोंडमा अनं तुना अंतकरणमा शे, म्हणीन तुले त्यानाप्रमाणे वागता ई.

15दखा, जीवन अनं सुख, अनी मरण अनं दु:ख, हाई आज मी तुनापुढे ठेयेल शे. 16तू आपला देव यहोवा यानावर प्रिती कर, त्याना मार्गतीन चाल, अनी त्याना आज्ञा, विधी अनं नियम पाळ, हाई आज्ञा आज मी तुले दि राहिनु शे; म्हणजे तू जिवत राहिसन बहुगुणित व्हशी अनी जो देश वतन करी लेवाले तू जाई ऱ्हाईना शे तठे तुना देव यहोवा तुले बरकत दि. 17पण तुनं मन फिरनं अनं तू आयक नही अनी भटकीसन अन्य देवसले दंडवत घालनास अनं त्यासनी सेवा करी. 18तर तुना खात्रीतीन नाश व्हई अनी यार्देन नदी ओलांडीन जो देश तू वतन करी लेवाले जाई ऱ्हाईना शे तठे तू जास्त दिन ऱ्हावावुस नही, हाई मी आज तुले बजाडीसन सांगस. 19आकाश अनं पृथ्वी यासले तुनाविरूध्द साक्षीले ठेईन मी आज सांगस की, जीवन अनं मरण अनी आशिर्वाद अनं शाप मी तुनापुढे ठेयेल शेतस; म्हणीन तू जीवन निवडी ले म्हणजे तू अनं तुनी संतती जिवत राही. 20आपला देव यहोवा यानावर प्रिती कर, त्यानी वाणी ऐक अनं त्याले धरीन ऱ्हाय, कारण त्यामाच तुन जीवन शे अनं त्यानामुयेच तू दीर्घायु व्हशी; तश करनास तर तुना पुर्वज अब्राहाम, इसहाक अनं याकोब यासले जो देश देवानी परमेश्वरनी त्यासनासंगे शपथ वाहेल व्हती त्यामा तुनी वस्ती व्हई.