अनुवाद 29

मवाब देशमा इस्त्राएल लोकसनासंगे परमेश्वरनी करेल करार

1जो करार होरेबमा परमेश्वरनी इस्त्राएल लोकसनासंगे करेल व्हता त्यानाशिवाय जो करार मवाब देशमा त्यानी त्यासनासंगे करानी मोशेले आज्ञा करेल व्हती त्या करारनं वचनं ह्या शेतस.

2मोशेनी सर्वा इस्त्राएल लोकसले बलाईसन सांगं, परमेश्वरनी मिसर देशमा तुमनासमक्ष फारोनं अनं त्याना सेवकसनं अनं त्याना सर्वा देशना काय करा ते तुम्हीन दखेलच शे. 3म्हणजे तुम्हीन आपला डोयासघाई दखेल महान संकट, चिन्ह अनं मोठा चमत्कार. 4पण आजपावत परमेश्वरनी तुमले समजाले मन, दखाले डोया अनं ऐकाले कान देल नही शेतस. 5मी तुमले चाळीस वरीस जंगलमाईन चालाडं, पण तुमना आंगवरना कपडा कुजनात नहीत किंवा तुमना पायमाधलं पायतणं घसायनात नहीत. 6मी परमेश्वर तुमना देव शे, हाई तुमले समजाले पाहिजे म्हणीन तुमले खावाले भाकर भेटनी नही अनी पेवाले द्राक्षरस किंवा मद्यपान भेटनी नही. 7तुम्हीन हाई स्थानमा येवावर हेशबोनना राजा सीहोन अनी बाशानना राजा ओग आपलासंगे युध्द कराले समोर वनात तवय आपण त्यासना पराभव करा; 8अनी त्यासना देश लिसन रऊबेनी, गादी अनी मनश्शेना अर्धा वंश यासले वतन म्हणीन दिधा. 9तुम्हीन जे काही करशात त्यामा तुमले यश भेटाले पाहिजे म्हणीन ह्या करारनं वचनं काळजीपुर्वक पाळानं.

10तुम्हीन सर्वा आपला देव यहोवा यानासमोर आज उभा शेतस; तुमना प्रमुख, तुमना वंश, तुमना वडीलजण, अनी तुमना अधिकारी अनं सर्वा इस्त्राएल लोक, 11तुमना पोऱ्यासोऱ्या, तुमन्या बाया अनं लाकूडतोड्यापाईन पाणक्यापावत तुमना छावणीमाधला सर्वा उपरी आज यानाकरता उभा शेतस की, 12जो करार तुमना देव यहोवा आज तुमनासंगे करी राहिना शे अनं जे वचन शपथपुर्वक तुमले दि राहिना शे, त्यामा तुम्हीन सामील व्हवानं. 13अनी त्यानी तुमले सांगेलप्रमाणे अनं तुमना पुर्वज अब्राहाम, इसहाक अनं याकोब यासले देल शपथनुसार तुमले आपली प्रजा ठरावानी अनी त्यानी तुमना देव व्हवानं. 14हाऊ करार अनं हाई शपथ मी फक्त तुमनासंगे करस अश नही. 15तर आपला देव यहोवा यानासमोर जो आज आठे उभा शे अनी जो आठे हजर नही, त्यानासंगेबी करस. 16आपण मिसर देशमा कश राही राहिंतु अनं येगयेगळा राष्ट्रसमाईन प्रवास करीन आपण कश वनुत हाई तुमले ठाऊकच शे; 17त्यासन्या दगडन्या अनं सोनं चांदिना मुर्ति अनं इतर अशुध्द वस्तु तुम्हीन दखात; 18आज आपला देव यहोवा यानापाईन परावृत्त व्हईन त्या राष्ट्रसना देवसनी सेवा कराले आपलं मन प्रवृत्त करी अश एकादा माणुस, बाई, कूळ किवा वंश तुमना लोकसमा कदाचित व्हई! कोणले माहित! विष अनं कडूदवणा येनारं मूळ तुमनामा व्हईच! 19जर मी आपला मनना ईच्छातीन वागनु तरी मना कुशलच व्हई अश तो आपला मनना समाधान करी ली, पण त्यामुये सुक्यानाबरोबर ओलंभी जळी जाई. 20परमेश्वर त्याले कधीच क्षमा करावू नही; पण त्याना कोप अनं त्यानी ईर्ष्या अश माणुसवर पेटी, अनं ह्या ग्रंथमा लिखेल सर्वा शाप त्याले लागतीन, अनी परमेश्वर पृथ्वीवरीन त्यानं नाव खोडी टाकी. 21नियमशास्त्रना ह्या ग्रंथमा जो करार लिखेल शे त्यामाधलं सर्वा शापवचनप्रमाणे परमेश्वर त्याना वाईटनाकरता त्याले इस्त्राएलना सर्वा वंशमाईन येगळा करी. 22तुमनानंतर येनारी पुढली पीडीमाधलं तुमना पोऱ्या अनी दूर देशमाईन येनारा परका हाई देशनी विपत्ती अनी ह्यामा परमेश्वरनी पसारेल रोग दखतीन. 23अनी हाऊ सर्वा देश गंधक अनं खार यासघाई इतलं जळी जायेल शे की, आठे काही पेरणी कापणी व्हस नही, आठे गवत उगस नही, पण परमेश्वरनी कोपायमान अनं क्रोधयुक्त व्हईन सदोम, गमोरा, अदमा अनं सबोयीम यासना नायनाट करा तश यानाभी करेल शे, हाई त्यासले दखाई. 24तवय त्या किंवा सर्वा राष्ट्रमाधला लोके इचारतीन, परमेश्वरनी हाई देशनं अश काबंर करं व्हई? एवढं कोप भडकानं काय कारण? 25तवय लोके सांगतीन की, यासना पुर्वजसना देव यहोवा यानी मिसर देशमाईन यासले काढीन आणानं येळले यासनासंगे जो करार करेल व्हता तो यासनी मोडात. 26अनं ज्या देव त्यासले अपरिचित व्हतात अनं ज्या परमेश्वरनी त्यासले नेमी देल नव्हतं अश अन्य देवसनी त्यासनी सेवा करी अनं त्यासले दंडवत घालात. 27म्हणीन परमेश्वरना कोप ह्या देशवर भडकीन त्यानी ह्या ग्रंथमा लिखेल सर्वा शाप त्यासले दिधात. 28परमेश्वरनी रागतीन, क्रोधतीन अनं महाकोपतीन ह्या त्यासना देशमाईन त्यासनं नाश करात अनं दुसरा देशमा त्यासले फेकी दिधं, हाई आज आपण दखी ऱ्हाईनुत शे.

29गुप्तगोष्टी आपला देव यहोवा याना स्वाधीन शेतस, पण प्रगट करेल गोष्टी आपला अनं आपला वंशजसना कायमन्या शेतस; याना हेतु हाऊ शे की, ह्या नियमशास्त्रनं वचनं आपण पाळानी.