अनुवाद 1

होरेब पर्वतपाईन निंघानी आज्ञा

1यार्देनना पुर्व दिशाना रानमाधलं अरबमा सुफासमोरना, पारान, तोफेल, लाबान, हसेरोथ अनं दी-जाहाब यासना दरम्यान ज्या वचनं मोशे सर्वा इस्त्राएल लोकसले बोलना त्या ह्या शेतस. 2होरेबपाईन सेईर डोंगर मार्गे कादेश बर्ण्या अकरा दिनना वाटवर शे. 3चाळीसावा वरीसना अकरावा महिनाना पहिला रोजले जे काही इस्त्राएल लोकसले सांगानं म्हणीन परमेश्वरनी मोशेले आज्ञा करेल व्हती, त्यानाप्रमाणे त्यानी हाई सर्व त्यासले सांगं. 4मोशेनी हेशबोनात राहनारा अमोरीसना राजा सीहोन याले, अनी एद्रई आठे अष्ठरोथ आठला बाशानना राजा ओग यासना पराभव करी टाकं, 5त्यानानंतर यार्देन नदीना पुर्व दिशाना मवाब देशले तो ह्या नियमसना आर्थ सांगाले लागना;

6आपला देव यहोवा ह्यानी आपलाले होरेबमा सांगेल व्हतं की, तुम्हले हाई डोंगरवटीमा रावाले बराच दिन व्हयेल शेतस. 7तर आते आठेन निंघा, अनी अमोरीसना पहाडी प्रदेशमा अनी त्यासना जोडेपासना सर्वा प्रदेशमा चला, म्हणजे अरबमा, डोंगरवटीमा, तळवटीमा, नेगेबमा अनं समुद्रकिनारना कनान देशमा अनं लाबानोनपावत अनी फरात महानदीपावत जा. 8हाऊ देश दखा, मी तुमनापुढे ठेयल शे, म्हणीन परमेश्वरनी तुमना पुर्वज अब्राहाम, इसहाक, अनं याकोब यासले अनं त्यासनामांगेन त्यासना वंशजसले जो देश शपथपुर्वक देवानं करेल शे, त्यामा जाईसन तो देश वतन करी ल्या.

मोशे नायकसनी नेमणुक करस

(निर्गम 18:13-27)

9त्या येळले मी तुमले सांगेल व्हतं की, माले एकटाले तुमना भार सहन व्हस नही; 10तुमना देव यहोवा यानी तुमले बहुगुणित करेल शे म्हणीन आज तुमनी संख्या आकाशमधला तारासना इतलं शे. 11तुमना पुर्वजसना देव यहोवा तुम्हीन आते शेतस त्यासना हजारपट तुमले वाढवो, अनी आपला वचननाप्रमाणी तो तुमले आशिर्वाद देवो. 12तुमनं दगदग, तुमनं भार अनं तुमनं भांडण मी एकटा कोठपावत सहन करू? 13म्हणीसन तुम्हीन आपआपला वंशमाईन बुध्दीमान, समजदार अनं अनुभवी लोके निवाडा म्हणजे मी त्यासले तुमना प्रमुख नेमसु. 14तवय तुम्हीन माले बोलनात की, तू सांगस तशं करानं ठिक शे. 15म्हणीन तुमना वंशजपाईन बुध्दीमान अनं अनुभविक अशं मुख्य माणससले मी तुमना प्रमुख नेमात, म्हणजे तुमना वंशजप्रममाणे हजाराहजारांवर, शंभरशंभरांवर, पन्नासापन्नासांवर अनं दहादहांवर नायक अनं अमलदार नेमी दिधं.

16त्या येळले मी तुमना न्यायधीशसले आज्ञा करेल व्हती की, तुम्हीन आपापले भाऊबंधसना वाद ऐका; एखादा माणुस अनं त्याना भाऊबंद अनं त्यानाजोडेना उपरी यासनामा न्यायपनतीन न्याय करा. 17न्याय कराना येळले पक्षपात करू नका, धाकला मोठासना सारखाच ऐकी ल्या; कोणा तोंड दखीन भिऊ नका; कारण न्याय करानं काम देवनं शे; एखादा विषय तुमले अवगड वाटनं तर ते मनाकडे लई या म्हणजे मी ते ऐकसू. 18त्या येळले तुमना सर्वा कर्तव्यना बद्दलमा मी तुमले आज्ञा करेल व्हती.

कादेश बर्ण्यामा धाडेल हेर

(गणना 13:1-33)

19मंग आपण होरेबमाईन चाल करीन आपला देव यहोवा याना आज्ञाप्रमाणी ज्या मोठा अनं भयानक रान अमोरीसना पहाडी प्रदेशकडे जातांले तुमले लागनं, त्या सर्वा ओलांडीसन कादेश- बर्ण्यापावत पोहचनुत. 20तवय मी तुमले सांगनु की, अमोरीसना जो पहाडी प्रदेश आपला देव यहोवा आपलाले जो देवाव शे तठपावत तुम्हीन येल शेतस. 21दखा, तुना देव यहोवा यानी तो देश तुनापुढे ठेयेल शे; तुना पुर्वजसना देव यहोवा याने तुला आज्ञा करेलप्रमाणी त्यावर चढाई करीसन तो हस्तगत कर; भिऊ नको अनं कचरू नको.

22तवय तुम्हीन सगळा मनाकडे ईसन बोलनात, आम्हीन माणससले पुढे धाडतस म्हणजे ते त्या देशनी माहीती मियाडीसन कोणता मार्गतीन आमले जानं पडनं अनं कोणकोणता नगर लागनात यासनी माहीती आमले लयतीन. 23हाई गोष्ट माले पटनी म्हणीसन प्रत्येक वंशनामांगे एक अशा बारा माणसे मी निवडी लिधं. 24त्या निंघनात अनी पहाडी प्रदेशमा गयात अनी अष्कोल नालापावत जाईसन त्या देश हेरनात. 25त्यासनी त्या देशना काही फळ बी संगे लिधात अनी खाल आमनाकडे आणात, अनी त्यासनी अशी खबर आनी की, आपला देव यहोवा जो देश आपलाले देवाव शे तो उत्तम शे.

26पण तुम्हीन तठे जावानं सोडीन आपला देव यहोवा याना आज्ञाना विरूध्दमा बंड करात. 27तुम्हीन आपला तंबूमा कुरकुर करीसन बोलनात की, परमेश्वर आमना द्वेष करी राहिना शे, अनी म्हणीसन आमले अमोरीसना हातमा दिसन आमना सत्यानाश करानं हाई हेतुतीन त्यानी आमले मिसर देशमाईन काढी लयेल शे. 28आम्हीन कोठे निंघनुत? तठला लोके आमना पेक्षा धिप्पाड अनं उंच शेतस; तठला नगरं मोठा शेतस त्यासन्या तट आकाशपावत पोहचनात शेतस अनी तठे अनाकीना वंशज आम्ही दखा, अशं आमना भाऊबंदसनी आमले सांगं तवय आमना काळीजनं पाणीपाणी व्हयनं.

29तवय मी तुमले बोलनु, घाबरू नका, त्यासले भिऊ नका. 30तुमना देव यहोवा तुमनासंगे शे, त्यानी मिसर देशमा तुमना देखत जे काही करं, ते सर्वा करीसन तो तुमनाकरता लढी; 31अनी तुम्हीन जंगलमा बी दखा की, आठेपावत ई पोहचापावत जो सर्वा मार्ग तुम्हीन धरनात त्यामा तुमना देव यहोवा यानी माणुस जस आपला पोऱ्याले वाही लेस तशं तुमले वाही लिधं. 32एवढं करीसन बी तुम्हीन आपला देव यहोवा यानावर ईश्वास ठेवात नही. 33तुमनाकरता वाटमा तळ देवानं ठिकाण शोधाले अनी रातले अग्नीमा अनं दिनले ढगमा प्रगट व्हईसन, ज्या वाटतीन तुमले जाणं शे ती वाट तुमले दखाडाकरता तो तुमनापुढे चालना.

इस्त्राएल लोकसले परमेश्वरनी करेल शिक्षा

(गणना 14:20-45)

34तवय तुमनं बोलणं ऐकीसन परमेश्वरना कोप भडकना अनी तो शपथ लिसन बोलना, 35जो उत्तम देश तुमना पुर्वजसले देवानं मी शपथपुर्वक वचन देल व्हतं, तो देश हाई दुष्ट पिढीमाधलं माणसंपाईन एकना बी नजरमा पडावू नही. 36यफुन्नेना पोऱ्या कालेब हाऊ मात्र तो दखी; जी भुमीले त्यानं पाय लागनात ती मी त्याले अनं त्याना वंशजसले दिसु, कारण तो परमेश्वरले पुरा मनतीन अनुसरना शे. 37तुमनामुये परमेश्वर मनावर बी रागाईसन बोलणा की, तू पण त्या देशमा प्रवेश करावु नही. 38पण तुना सेवामा हजर राहनारा नूनाना पोऱ्या यहोशवा याना प्रवेश व्हई. तू त्याले धीर दे; कारण तो देश इस्त्राएलले वतन म्हणीसन तो मियाडी दि. 39अनी हाई लुटाई जाई अश ज्या तुमना पोऱ्यासोऱ्याविषयी तुम्हीन बोलनात ती, म्हणजे ज्या पोऱ्या बरावाईट जाणतस नही ती त्या देशमा जातीन, मी तो त्यासले दिसु अनी त्या देशले त्या वतन करी लेतीन. 40पण तुम्हीन परत जा अनी तांबडा समुद्रना वाटतीन रानमाईन चाल करा. 41तवय तुम्हीन माले अश उत्तर दिधा की, आम्हीन परमेश्वरना विरूध्द पाप करेल शे, तरी आमना देव यहोवा यानी आमले आज्ञा करेल प्रमाणी आम्हीन वर चढीसन अनं युध्द करसुत; अनी तुमनापाईन प्रत्येकनी आपला युध्दनी शस्त्र धारण करा अनी तुम्हीन डोंगराळ प्रदेशमा चढी जावाकरता तयार व्हयनात. 42तवय परमेश्वर माले बोलना, त्यासले सांग, तुम्हीन जाऊ नका अनं लढाई करू नका, कारण मी तुमनामा नही शे; तुम्हीन गयात तर तुमना शत्रु तुमना हाराई टाकतीन. 43त्या प्रमाणे मी तुमले सांगं पण तुम्हीन मना ऐकनात नही; उलट तुम्हीन तुमना देव यहोवा याना आज्ञाविरूध्द बंड करात अनी धिटाई करीसन त्या डोंगराळ प्रदेशमा चढाई करी गयात. 44तवय त्या डोंगराळ प्रदेशमा राहनारा अमोरी लोकसनी बाहेर पडीसन तुमनासंगे सामना करीसन मधमाशासनागत तुमना पाठलाग करात, अनी सेईर देशना हर्मापावोत तुमले पळाले लावात. 45तवय तुम्हीन परत ईसन परमेश्वरना जोडे रडू लागनात; पण परमेश्वरनी तुमना शब्द ऐका नही अनं तुमनाकडे ध्यान दिधं नही. 46तवय तुम्हीन कादेशमा बराच दिन वस्ती करीन राहिनात ते तुमले माहित शे.