Acoli Bible Revision
Jabuli 99
Lubanga en Rwot maloyo ducu
Rwot tye kaloc, wek rok ducu komgi omyel!
En obedo iwi komker mere ma kicibo iwi lukerubi; wek lobo oyenge!
Rwot dit i Cion;
en loyo lwak me rok ducu.
Wek dano ducu gupak nyingi madit me deyo makelo lworo!
En obedo ngat maleng!
In i Rwot matek, ma maro ngolo kop kakare,
in aye ma ikelo ngolo kop ki ada ma pe i lenge ikom ngat mo:
ikelo ngolo kop kakare ki kit ma atir,
imiyo ngolo kop ma atir omoko matek ikin jo pa Yakobo.
Wudwor Rwot Lubangawa,
wuwore inyim kom me teno tyene.
En obedo ngat maleng!
Moses ki Aron bene onongo gubedo tye ikin ajwakine,
Camuel bene onongo tye ikin jo ma gilwongo nyinge.
Gukok bot Rwot, ci Rwot ogamo doggi. 2
En oloko kwedgi ki i wir pol;
gugwoko lok me cadene,
ki cik ma en omiyo botgi.
Ai Rwot Lubangawa, in ceng igamo doggi,
inyutu bot lwaki ni, in Lubanga ma lawek bal,
ento ibedo laculkwor me gin maracu ma gutiyo.
Wudwor Rwot Lubangawa,
dok wuwore iwi got mere maleng;
pien Rwot Lubangawa leng.
Source notes (2)
- Cross-reference Nia 25:22
- Cross-reference Nia 33:9
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.