Jabuli 5

Lega pi gwok

1Cik iti wek iwiny loka, Ai Rwot;

dok iwiny cura.

2Rwota ki Lubangana, winy kokona ci ilara.

Abilego kun abako doga boti, Ai Rwot.

3I odiko iwinyo dwona;

ka ceng dong otuc akelo gituma boti,

ci dong akuru lagam ma a ki boti.

4In pe Lubanga ma cwinye bedo yom pi tim maracu;

in pe iye nywako kabedo ki gin marac.

5Pe iye ni jo ma gin luwake gucung inyimi;

idag lutim maracu ducu.

6Ityeko lugoba woko liweng,

in Rwot cwinyi dag jo ma lutim bwami ma gineko dano wa ki jo ma lubwola.

7Abidonyo i ot meri,

pi mar meri madwong ma pe loke;

abiworo in i ot meri maleng,

kun aryebe piny inyimi ki lworo madwong.

8Ai Rwot, lukwora gitye mapol;

tela wek atii gin matye atir inyimi,

dok imii yoni ma alubu obed atir. 91

Lok ma lukwora giwaco pe lok ada

cwinygi opong ki tam me nek keken,

gungamo doggi calo lyel ma twolo,

kun giloko lok mamit me bwolo dano.

10Pwodgi dok idwok balgi iwigi, Ai Lubanga;

mi yubgi maracu ma giyubu obed owic botgi.

Ryemgi woko ki inyimi gucit cen,

pien gutimo lwak bal mapol,

dok gujemo woko ikomi.

11Ento mi jo ma giringo gilaro boti gubed ki yomcwiny,

ci gin biwero wer kare ducu pi yomcwiny.

Dok igwok jo ma gimari;

pi in omiyo cwinygi yom adada.

12Pien in imiyo gum ki jo ma kitgi atir, Ai Rwot;

mar meri gengo komgi woko macalo kwot.