Jabuli 120

Lega pi lar

1Ikare ma atye i can, akok bot Rwot,

kun, akok ni,

2“Lara do, Ai Rwot,

ki bot jo ma doggi loko lok goba,

ki bot jo ma lebgi bwolo dano.”

3Kibimiyowu gin ango kono?

Dok gin ango makato ma kibitiyo ikomwu,

wun jo ma lebwu bwolo danoni?

4Kibicwalo atero mabit pa lulweny ikomwu,

ki lodi mac yen opok ma otwak!

5Aneno can adada, pien bedo ikinwu rac calo bedo i Mecek,

onyo macalo bedo i kema pa jo Kedar!

6Abedo dong arii pi kare malac tutwal

ikin jo ma dag kuc.

7Amito ni wabed ki kuc; ento tek aloko lok mo me kuc,

gin gimito cako lweny!