Jabuli 119:105

Cik pa Rwot

1Gitye ki gum jo ma pe tye ki bal mo,

ma gibedo kun gilubu cik pa Rwot!

2Gitye ki gum jo ma gwoko lok me cadene,

ma giyenyo en ki cwinygi ducu,

3gin jo ma pe timo gin marac,

ento gibedo kun gilubu yo pa Rwot.

4Dong ityeko miyowa ciki

ni walubgi ducu ki cwinywa ducu.

5Cwinya mito mada ni myero abed lagen i yona ducu me gwoko ciki!

6Ka aketo cwinya me lubu gin ducu ma ceng dong iciko,

ci bimiyo lewic pe bimaka.

7Abipaki ki cwiny matye atir,

ka dong apwonye i ciki matye atiri.

8Abigwoko gin ma iciko;

pimeno pe ibwota woko!

Lubu cik pa Rwot

9Jo matino gibigwoke ningning ma pe gibalo?

Gin bigwoke kun gilubu lok ma in iciko.

10An ayenyo in ki cwinya ducu;

gwoka wek pe angak woko ma abwoto lubu ciki.

11An dong akano loki i cwinya,

wek pe atim bal mo inyimi.

12Apaki, Ai Rwot;

pwonya ki ciki!

13Abitucu ki doga kamaleng

lok ducu mayam iciko ma oa ki idogi.

14Cwinya yom kalubu cik meri,

makato lonyo madwong ma alimo ducu.

15Abilwodo lok me pwonyi ki i cwinya,

dok abiketo wanga me ngiyo kit yo me pwonyi ducu.

16Abibedo ki yomcwiny pi ciki;

wiya pe biwil ikom loki wa ki acel.

Yomcwiny pi lubu cik pa Rwot

17Nyut beri bota an latici,

wek abed kun alubu loki.

18Yab wanga wek abed ma aneno piny,

wek anen jami aura matye i ciki.

19An atye macalo labedo iwi lobo man;

pe ikan ciki woko ki bota!

20Cwinya puke pi kare ducu

kun amito niang lok me ciki.

21Ijuku jo ma lungala, ma dong kiceno,

gin jo ma gungak gubwoto ciki.

22Kwany yetgi ki cacgi woko ki ikoma,

pien abedo ka gwoko lok me cadeni.

23Kadi bed rwodi gicoke kacel gibedo kapiro lok ikoma,

ento an latici pud abimede kalwodo lok ikom ciki.

24Lok me cadeni yomo cwinya mada;

gin aye lumiina tam.

Keto cwiny pi lubu cik pa Rwot

25Abutu piny i apwa ma dong kiloya woko;

roc kwona odoco kit macalo yam iciko!

26Ikare ma atucu boti gin ducu ma ceng atiyo,

in igamo doga;

pwonya dong ki lok me ciki.

27Konya wek ange kit yo ma myero alub kwede ciki,

ci abibedo kalwodo lok ikom tici me aura ma dong itiyo.

28Cwercwiny dong obwoya woko;

miya teko, kit macalo yam iciko.

29Gwoka wek pe alub yo marac,

ci ipwonya ki ciki pi kicani.

30Ayero dong me bedo ngat ma gene,

kun aketo cwinya ikom ciki tutwal.

31Ai Rwot, atyeko mako lok me cadeni woko liking;

pe iwek lewic omaka.

32Cwinya mito lubu ciki,

pien dong ityeko medo niang matut bota.

Lega me bedo ki niang matut

33Ai Rwot, pwonya wek ange kit yo ma myero alub kwede ciki,

ci abigwoko nio wa i agiki.

34Miya aniang i ciki, wek agwokgi,

ci abibedo kalubune ki cwinya ducu.

35Tela i yo me ciki,

pien yomo cwinya mada.

36Wek abed ki miti me lubu lok me cadeni,

ma ka nongo lonyo pira kena.

37Pe iwek abed kaneno jami atata ma konygi peke;

ento miya kwo me lubu yoni.

38Cob cikeni bota an latici,

ma icike kwede bot jo ma gilwori.

39Kwany tim cac ma alworo woko ki ikoma;

pien ciki ducu beco.

40Nen, cwinya puke pi nongo ciki;

pien in ipore, miya dong kwo!

Geno cik pa Rwot

41Nyuta kit macalo mar meri ma pe loke tye kwede ikoma, Ai Rwot,

dok ilara, kit macalo yam iciko.

42Man bimiyo abedo ki lagam bot jo maloko lok me yet ikoma,

pien ageno loki.

43Pe ikwany lok me ada woko ki idoga,

pien gena tye i cik ma meri.

44Abigwoko ciki teretere ma pe akeng,

abigwoko nakanaka!

45Abibedo agonya,

pien dong ateme me lubu ciki.

46Abitito lok me cadeni bene inyim luker,

ma lewic pe bimaka wa ki acel.

47Anongo yomcwiny i lubu ciki ducu,

pien amarogi mada.

48Aworo ciki, dok amarogi,

abilwodo lok me ciki ki i cwinya.

Gen ikom cik pa Rwot

49Po pi lok ma iloko bot latici,

ma imiya dong aketo gena iyeni.

50Kadi ka atye i can, loki kweyo cwinya;

pien cikeni dong omiya kwo.

51Jo ma luwake dong ginywara anywara,

ento pe aloke aweko ciki.

52Ka apo ikom cik mayam ipwonya kwede ikare ma okato angec,

kweyo cwinya, Ai Rwot.

53Akemo malyet omaka woko pi jo maracu,

gin jo ma gibwoto ciki pe gilubu.

54Ka mo ducu ma abedo iye,

ayubu wer ma awero pi ciki.

55Apo piri i dyewor, Ai Rwot,

dok alubu ciki.

56Man aye gum ma alimo

pien agwoko ciki ducu.

Keto cwiny i cik pa Rwot

57In aye gin ma amito, Ai Rwot;

acike me lubu loki ducu.

58Alegi ki cwinya ducu,

tima kica, kit macalo yam icike kwede.

59Ka atamo pi yoni,

ci aloke acike me lubu lok me cadeni.

60Arune woko oyotoyot ma pe agale

pi lubu ciki.

61Kadi bed jo maracu giciko tolgi giruma kwede dyere,

ento wiya pe biwil ikom ciki.

62I dyewor aa malo kapaki,

pi ciki matye atir.

63An larem dano ducu ma lwori,

ki jo ma gilubu ciki.

64Ai Rwot, lobo opong ki mar meri ma pe loke;

pwonya ki ciki!

Ber matye i cik pa Rwot

65Ai Rwot, igwoko cikeni giri,

dok itiyo kweda maber, an latici.

66Pwonya ki ryeko ki ngec maber,

pien ageno gin ma iciko.

67Ikare ma pud peya imiya can,

onongo angak woko ata;

ento kombedi dong agwoko loki.

68In iber, dok itimo gin maber bene;

pwonya ki ciki.

69Jo ma luwake gimedo lok goba ikoma,

ento an alubu ciki ki cwinya ducu.

70Jo meno wigi oding woko,

ento an anongo yomcwiny i lubu ciki.

71Can ma alimoni obedo ber bota matek,

oweko apwonye ikom lok me ciki.

72Lok me cik ma imiya ber bota

makato lwak lim me jabu ki ryal alip ki alip.

Ngolo kop ki cik pa Rwot

73Cingi aye ocweya dok igwoka bene maber;

miya niang matut wek apwony lok me ciki.

74Jo ma lwori gibinena ci gibedo ki yomcwiny,

pien dong ageno loki.

75Ai Rwot, angeyo ni ngolo kopi tye atir,

imiyo aneno can pi gene ma itye kwede.

76Wek mar meri ma pe loke obed pi kweyo cwinya,

kit macalo yam icike kwede bota an latici.

77Tima kica wek abed kwo,

pien anongo yomcwiny i ciki.

78Wek lewic omak jo ma giwake pien gidota ki lok goba;

ento an abibedo kalwodo lok ikom pwonyi.

79Wek jo ma gilwori gubin bota,

ci gunge lok me caden meri.

80Wek abed ma cwinya leng kun alubu ciki,

wek lewic pe omaka.

Lega pi lar

81An dong aol woko pi kuru lar meri;

an ageno lok meri keken.

82Wanga dong ojony woko pi kuru neno gin ma icike pire;

apenye ni, “In ibikweyo cwinya naka awene?”

83Dong adoko calo opoko kongo bwino ma yito obalo woko,

ento wiya pud peya owil ikom ciki.

84Imito an latici akur pi kare marom mene?

Ibingolo kop ikom jo ma gilibani awene?

85Jo ma luwake ma pe gilubu cikini

gukwinyo bur ma myero apot iye.

86Ciki ducu tye ada;

ento dano giliba labongo tyen lok mo;

konya do!

87Onongo dong gicok kwanyo kwona woko ki i lobo,

ento an pe abwoto ciki.

88Miya abed kwo pi mar meri ma pe loke,

wek agwok lok me cadeni mayam iloko ki dogini.

Bedo ki niye i cik pa Rwot

89Ai Rwot, lok ma meri bedo nakanaka;

tye ma ocung woko liking i polo.

90Gene ma itye kwede bedo bot yalwak me kare ducu;

iketo lobo ocung matek i kabedone.

91Jami ducu ocung nio wa onyo pi ciki;

pien gin ducu lutici.

92Ka nene pe anongo yomcwiny i ciki,

kono ato i cana.

93Wiya pe biwil ikom ciki,

pien igwoka ma pud akwo pi lubu ciki.

94An a danoni, lara do!

Atemo lubu ciki mada.

95Jo maracu gikane gikiya wek gineka woko,

ento an atamo pi lok me ciki.

96Dong aneno ni jami ducu ma iwi loboni agikigi tye,

ento ciki pe tye ki agikine.

Mar pi cik pa Rwot

97Amaro ciki tutwal!

Dok abedo kalwodo lok ikom ciki dyeceng jwi.

98Ciki miyo abedo ryek ma akato lukwora woko,

pien atye kwede nino ducu.

99Dong atye ki niang maber ma oromo,

akato lupwonya woko ducu,

pien abedo kalwodo lok ikom lok me cadeni kare ki kare.

100Aniang bene aloyo jo muteggi,

pien alubu gin ma iciko.

101Ajuke kena wek pe atim gin marac,

pien amito gwoko loki.

102Pe aweko ciki,

pien in dong ityeko pwonya.

103Loki bile mamit adada ki bota

lim idoga makato moo kic woko!

104Alimo niang madwong ki i ciki

pimeno omiyo akwero yo me goba ducu.

Dero matye i cik pa Rwot

105Loki calo tara ma menyo ka tyena,

dok tye calo ceng ma menyo yoo ma awoto iye.

106Dong atyeko kwongo kwong dok amoko bene,

me lubu ciki matye atir.

107Arem me can ma atye kwede dong oketo koma woko;

Ai Rwot, gwoka abed makwo kit macalo yam icike kwede.

108Gam pwoca me pak ma akelo boti, Ai Rwot,

dok ipwonya ki ciki.

109Kare ducu ayube me dyero kwona i peko,

ento wiya pe wil ikom ciki.

110Jo maracu guciko owic me maka,

ento an pe angak aweko lubu ciki.

111Lok me ciki gin aye ginaleya ma mera ma bedo nakanaka;

gin aye yomcwiny ma mera.

112Aketo cwinya ada me tiyo gin ma iciko

nakanaka, nio wa nino me agiki.

Cik pa Rwot miyo dano bedo gwoke

113Adag jo ma tamgi tye aryo,

ento amaro ciki.

114In aye kalarena ki kwota,

ageno lok ma iciko.

115Ayu woko ki ingeta, wun lutim maracu,

wek an abed kun alubu cik pa Lubangana.

116Konya macalo yam iciko, wek abed kwo,

pe iwek kiket lewic ikoma pi gen ma dong atyeko geni kwede.

117Tinga malo, ci abibedo maber i gwok ma meri,

miyo abiketo cwinya kalubu ciki kare ducu.

118Ikwero jo ma ngak woko ma giweko lubu ciki;

tim bwologini konye peke.

119Itero jo maracu ducu matye iwi loboni calo yugi;

pimeno an amaro lubu ciki.

120Koma ducu myel amyela pi lworo in,

apong ki lworo pi ngolo kop ma meri.

Lubu cik pa Rwot

121Atiyo gin matye atir dok kakare;

pe iweka i cing jo ma giunani.

122Cike bota ni ibitimo gin maber pira, an latici,

dok pe iwek jo ma pe gilworo Lubanga gutera marac.

123Wanga dong ojony woko pi kuru lar meri,

ki pi cobo cikeni matye atiri.

124Tii ki latici ki mar meri ma pe loke,

dok ipwonya ki lok me ciki.

125An latici, miya niang maber,

wek ange lok me cikeni.

126Rwot, kare dong oromo myero i tim gin mo,

pien lwak guturu ciki woko pe dong gilubu.

127Adada amaro ciki

makato jabu, makato jabu ma kiliyo maber.

128Atiyo ki ciki me tela i kwona;

adag kit yo ducu me goba.

Miti me lubu cik pa Rwot

129Ciki ducu tye me aura;

pimeno alubugi ki cwinya ducu.

130Niang ikom loki miyo dero bot dano,

dok miyo niang bot jo ma peke ki ngec.

131Angamo doga, abedo kaomo cwinya ki yweyo,

pien amito alub ciki.

132Loke tung bota, ci itima kica,

kit macalo itimo kwede kica bot jo ma maro in.

133Gwoka wek pe apoti,

kit macalo yam dong iciko,

pe iwek bal mo oloo kwona.

134Lara woko ki i cing jo ma giuna,

wek abed kun agwoko ciki.

135Nen latici ki wang me kica,

dok ipwonya ki lok me ciki.

136Pig wanga cwer dok mol matek,

pien dano pe gigwoko ciki.

Cik pa Rwot tye atir dok kakare

137In kiti tye atir, Ai Rwot,

dok kop ma ingolo tye atir.

138Ciki ma imiyo ducu gitye atir,

dok bene gigene.

139Arima ki kiniga wango koma calo mac,

pien lukwora wigi owil woko ikom loki.

140Cikeni gene atika,

omiyo an latici amarogi mada.

141An pira pe tek, dok kicaya bene,

ento wiya pe wil ikom lok me ciki.

142In kiti tye atir dok bedo nakanaka,

ki ciki bene cik me ada.

143Can ki cwercwiny dong opoto woko ikoma,

ento ciki aye miya yomcwiny.

144Lok me ciki tye atir dok bedo nakanaka;

miya niang maber ci weko abedo kwo.

Lega pi lar

145Akok boti ki cwinya ducu; gam doga, Ai Rwot!

Abigwoko ciki.

146Akok boti;

lara do, ci abilubu lok me ciki.

147Aa malo ma pud peya piny oru ci akok boti pi kony;

pud ageno loki.

148Abutu i dyewor ci aco woko, wanga bedo twolo,

kun abedo kalwodo pi ciki ki i cwinya.

149Ai Rwot, winy dwona pi mar meri ma pe loke;

roc kwona odoco i ngolo kopi matye atiri.

150Jo ma giliba ginyiko cok kun gitamo me timo gin marac ikoma;

gin jo ma pe gilubu ciki.

151Ento in icok kweda, Ai Rwot,

ki ciki ducu tye me ada.

152Yam con apwonye ki ilok me cik ma meri,

ma iketogi me bedo nakanaka.

Koko pi kony

153Nen cana dok i lara,

pien wiya pe wil ikom ciki.

154Pid pira ci ikoka;

miya kwo kit macalo yam iciko.

155Lare bor mada ki bot jo maracu,

pien pe giye lubu ciki.

156Ento kicani dit makato, Ai Rwot;

miya kwo kit macalo loci tye atiri.

157Jo ma lwenyo ikoma ki lumeroka gipol,

ento pe alenge aweko lubu ciki.

158Ka aneno jo ma pe gigene, ci cwinya lema,

pien pe gigwoko ciki.

159Tam kit macalo amaro kwede lok me ciki!

Gwok kwona pi mar meri ma pe loke.

160Loki ducu ocung ikom ada,

ciki ducu tye atir gibedo nakanaka.

Keto cwiny pi lubu cik pa Rwot

161Rwodi lwenyo ikoma labongo tyen lok mo,

ento abedo kun atye ki lworo i cwinya pi loki,

162Abedo ki yomcwiny pi loki

calo dano ma onongo jami mapol ma kiyako.

163Adag dok akwero lok goba,

ento amaro ciki.

164Apaki nino ki nino tyen abiro

pi ciki matye atir.

165Jo ma maro ciki limo kuc madit;

pe tye gin mo mamiyo giyoke atata.

166Ai Rwot, ageno lari,

dok bene atiyo gin ma ciki mito.

167Agwoko lok me ciki ducu i cwinya,

dok amarogi ma pe twere.

168Agwoko ciki ki lok ma ipwonya kwede ducu;

gin ducu ma atiyo tye kamaleng inyimi.

Lega pi kony

169Wek kokona oo boti do, Ai Rwot;

miya abed ki niang maber ma lubu kit ma iciko.

170Wek lega me bako doga bene oo boti;

lara kit macalo yam icike kwede.

171Abingamo doga kun apaki,

pien in ipwonya ki ciki.

172Abiwero awera ki leba lok me ciki,

pien ciki ducu tye atir.

173Yube kun iketo cingi me konya,

pien dong ayero me lubu ciki.

174Cwinya mito mada me neno lari, Ai Rwot,

dok ciki aye miya yomcwiny.

175Miya abed kwo, wek abed ka paki,

wek pwony me ciki bene okonya.

176Angak woko ata calo romo murwenyo;

myero iyenya, an latici,

pien wiya pe owil ikom ciki.