Joel 3

Lubanga bingolo kop ikom rok ducu

1Rwot owaco ni,

“Nen, inino meno, ki ikare maca,

abidwoko gum me Juda ki me Jerucalem pien jo ma bibwot bibedo tye.

2Abicoko rok ducu ma gin lumerok pa Juda, abikelogi i nota pa Yekocapat.1

Ci abingolo kop ikomgi ki kunu,

pi jona Icrael ma ginaleyana, pien gukeyogi woko ikin lurok,

dok gupoko lobona woko.

3Gin gubedo kabolo kwir pi jo mera,

kun gicato awobi pi culu malaya,

dok gicato nyako me wilo kongo bwino wek gumat gumer kwede. 42

Wun jo Turo ki jo Cidon, ki wun jo ducu ma i lobo Piliciti, gin ango ma wumito timo ikoma? Wun wumito culu wang kwor mo ikoma? Kace wubiculu, ci abidwoko cul me tim mewu iwiwu kenwu oyotoyot dok aruya bene. 5Pien wukwanyo ryal mera ki jabuna, dok wutero jamina mabeco ma pirgi tego bota, ci wuketogi i ot jogiwu. 6Wucato jo Juda ki jo me Jerucalem bot jo Grik, kun wuterogi kamabor ki wang lobo meggi. 7Ento koni abitwarogi malo wek gua woko ki i kabedo kama yam wucatogi iye; ci abitimo ikomwu kit mayam wutimo ikomgi. 8Abiweko kicato lutino awobewu ki anyirawu bot jo Juda. Ci gin bicatogi bot jo Ceba, en rok matye kamabor. An Rwot dong atyeko waco.

9Wutit lok man ikin rok ducu:

wuywak mony

wulyet cwiny oteka lweny;

wek lulweny ducu gurwa cok, gubin ka lweny. 103

Wutet kweri dyang gudok pala lucwan,

wutet pala langol wulok gudok tong;

wupwony kadi wa lugorowu wek gudok oteka lweny.

11Wurune, wubin oyot,

wun rok ducu ma wutye kabedo ducu;

wucit, wugure kunu i nota pa Yekocapat.”

Ai Rwot, dong icwal cogi coni ka lweny ikomgi!

12“Wek rok ducu dong gumuke gubin,

gubin kany wa i nota pa Yekocapat.

An Rwot kikoma abibedo piny kunu kangolo kop ki rok ducu ma gitye cok. 134

Gin gicalo kal madong ocek5 woko i poto me akaya.

Wucit ikomgi macalo lapur cito kakayo kal.

Gin gicalo nyig olok madong kiduru opong i bur me anyona,

pien balgi dwong tutwal.”

14Lwak alip ki alip,

dong gucoke i nota me ngolo kop.

Pien nino pa Rwot dong tye cok, nino ma en bimiyogi iye pwod.

15Ceng ki dwe bicido woko licuc,

lakalatwe bene pe gibiryeny.

Lubanga bimiyo gum ki jone

166

Rwot mor ki i Cion,

dwone winye ki i Jerucalem,

polo ki lobo giyenge.

Ento Rwot aye kalare pa jone,

en kama jo Icrael gibwot iye.

17Rwot waco ni, “Kitmeno wun jo Icrael wubingeyo ni An a Rwot Lubangawu,

ma abedo i Cion ma got mera maleng,

Jerucalem bene bibedo maleng,

dok mony pa lurok dong pe biloyone matwal.

18Inino meno wi godi bipong ki poti olok,

ki dyangi bene bipong iwi cere ducu,

pii bipong kun mol ki i kulu ma i Juda ducu.

Wang it bigunye ki i Ot pa Rwot,

ci bipongo nota me Citim.

19Ejipt bidoko tim aroo ata,

ki Edom bene bidoko obur,

pi timgi me gero ikom jo Juda,

pien guonyo remo pa jo ma peke ki bal i lobogi.

20Ento dano dong bibedo i Juda matwal,

ki i Jerucalem pi kare ducu.

21Abiculu kwor me remogi,

pe abikwanyo kop woko ki ikom luting alii,

pien an Rwot abibedo i got Cion.”