Okusuululilwa 15

Oluzina lwo Omutaámbwa na Musa

1Niho, naábona olumanyiso olúundi omu igulu, lukaba ni lukulu no lwo kusobeza. Nkabona iínti, maléeka musaanzu bakaba nibaleéta ennáku musaanzu ezo omuhélo. Ennáku ezo zikaba zili zo kumaliliza echihulumuko cha Múungu. 2Káandi naábona echiintu éecho chikaba chili nke enziba yi ilole éezo etulaaniilwe no omulilo. Na aho omu ngeégeelo hakaba hemeeliilwe abo abaantu abaabeele basiingile enyameéswa ezo mpáango, echisusano chaáyo, hamo no okubala kwi izíina lyaáyo. Abaantu abo bakaba bakwaatiliile endono omu ngalo záabo éezo bakaba baheélwe na Múungu. 3Bakaba nibazina oluzina lwa Musa1 omuzáana wa Múungu no olwo Omutaámbwa, nibagaámba báti,

“Omukáma Múungu Omuzizi wa Byóona,

ebikolwa byaawe ni bikulu ne byo kusobeza.

Íiwe níiwe Omukáma wa amahaánga góona,

ne emiháanda yaawe ne ya amazima na ne eyo obuliho.

4Íiwe Mukáma, noóha atakukweéganya

no kulikúza izíina lyaawe?

Habwo kuba íiwe weénka níiwe omutakatíifu.

Abanyamahaánga bóona nibeéza no okukulamya,

habwo kuba ebikolwa byaawe bya amazima nibibonwa butúnu.”

Maléeka musaanzu abaabeele nibaleéta ennáku

5Obuchilo ago kagahiingwiile, naáleeba éenzu ya Múungu echiíngwiilwe omu igulu, ensoonga iheéma lya buulubona2 bwo kubaho kwa Múungu. 6Maléeka musaanzu abo abeena ennáku musaanzu baasoholámo omwo. Bakaba beechumile emyéenda za kitani3 nduunzi mala beebohile emisumi ye ezaháabu omu kalezi káabo. 7Oómo kuluga omuli ebyo bihaángwa bina ebyo obulami yaábaha abo bamaléeka musaanzu ebíibo musaanzu bye ezaháabu éebyo ebiizwiile echihulumuko cha Múungu óogwo alama obucha no obuchiile. 8Omwo omu nzu ya Múungu, gwéezula omwíika óogwo gwaaleteliilwe ni ikuzo lya Múungu no obuhicha boómwe. Tihaliho óogwo yaakuhicha kutaaha omu nzu ya Múungu káandi kuhika obuchilo ennáku ezo za musaanzu za bamaléeka abo zilaáhikiílizibwa.