Bibilia ya Kizalamo

2YOHANA 1

Lupwilili luno lolawa ha Yohana, m'vyele.1

Nomwandikila mtwanzi yasaguligwe na Mulungu hamoja na wanage,2 awo iniwanogele kwelikweli, na sio nie tu, ila vivija wose woitanga ikweli, sama ya kweli ikala mgati yetu na yowa na tweye milongo yose.

Ngekewa, bazi, na tindiwalo kulawa ha Mulungu Tata na kulawa ha Yesu Kilisto vowa hamoja na tweye muikweli na mdinoge.

Kweli na Noge

Nideng'ha ng'hani viniwavikile wanago wayagwe wotembela muikweli kamba vija Tata viyatulagize. Na sambi, gweye mtwanzi, sikwandikila ndagizi ya sambi, ila ija itukalile nayo songela haichanduso. Na tuinogele. Na dino dijo noge, kamba, tolondigwa tukale mkuzigoga ndagizi za Mulungu. Kamba vumuhulike songela haichanduso kamba, muinogele wenyego kwa wenyego.

Wavwizi bwando weza muulumwengu, awo wolema kutogola kamba Yesu Kilisto keza mulukuli. Munhu yoyose yolema kutogola mbuli kamba zino hiyo m'vwizi na m'beza Kilisto. Teganyeni sambimchase kija kimsang'hanikile, ila m'bokele nhunza yenu yose.

Munhu yoyose yokimbilila kuulongozi na kuleka kukala mmafundo ga Kilisto hali hamoja na Mulungu. Munhu yoyose yokala mmafundo ka hamoja na wose wabili, Tata na Mwana. Munhu yoyose yeheza kumwenu na kuleka kufundiza mafundo gano, sambimum'bokele ama kumwingiza mzing'anda zenu. Kwavija munhu yoyose yom'bokela kosangila msang'hano zake zihile.

Mbuli za Kimambukizo

Nnago bwando ga kuwandikileni, ila silonda nyandike na wino mkalatasi, ila nolonda niwatembelele na kulongelela na mweye kihanga kwa kihanga avo deng'ho jetu divikizwe.

Wana wa lumbu3 jenu yasaguligwe na Mulungu wowalamsa.

Source notes (3)

Footnote Hano m'vyele nhegulo yake mkulu wa wanhu wamtogole Kilisto.
Footnote Hano mtwanzi nhegulo yake dale da wanhu wamtogole Kilisto , na wanage nhegulo yake madale ga mmambwegambwega gasongezwe na dale dino.
Footnote Wana wa lumbu jenu nhegulo yake didale da wanhu wamtogole Kilisto dikalile kuyakalile Yohana.

Bibilia ya Kizalamo. Copyright © 2023 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.