Abheeburania 3

Yeesu ni mukuru kukira Musa

1Kweego, abhahiiri bhaane abhahoreeru, bhano mukugwaatana mumbirikiriro ya Taatabhugya, mwiiseege iguru wa Yeesu, wuno ni Mweega wa Taatabhugya kweeki ni Museengeri Omukuru wuno tukumwiikirirya. 2Yeesu yaari muheene kukora goosi gano Taatabhugya yamusoriri akore, kyeego Musa1 neewe yaari omukaangati omuheene wa abhaatu bhoosi bha munyuumba ya Taatabhugya, nibho Abhiiziraeri.2 3Omwoomboki ahaahaabhwa obhusuuku kukira enyuumba yino yoombokiri, egoego Yeesu neewe areenderwa okuguungibhwa bhukongʼu kukira Musa. 4Enyuumba yoyoosi ehoombokwa no omwoomboki omurebhe, nawe Taatabhugya niwe Omwoomboki Omukuru we ebhigiro bhyoosi.

5Musa yaari omubhagati omuheene kubhaatu bha munyuumba ya Taatabhugya. Emirimo gyaaye gyaari ni kubhabhuurira abhaatu bhayo goosi gano Taatabhugya yaari yiiseegiri okugaamba embere eyo. 6Nawe, Krisito ni Mwaana omuheene wuno akwiimeererera abhaatu bha munyuumba ya Taatabhugya. Na neetwe ni bhaatu bhe enyuumba yaaye kyeego turaageenderere okwiikongʼeererya no okwiizuungya mugano tukwiisigira.

Obhurekya iguru yo okwaanga okwiikirirya

7Kweego, tukweenderwa okwiitegeerera gano Ekoro Muhoreeru akubhuga mu Makaamo Amahoreeru,

“Reero, hano muriigwe eriiraka rya Taatabhugya,

8mutabha murazikora eziikoro zyeenyu kubha kongʼu,

kyeego bhazaazi bheenyu bhaari bhakwaanga okukaangatibhwa neenye,

hano bhaari bhakunisakya mwiitirigo.

9Mwiitirigo eyo, niyo bhazaazi bheenyu bhaari bhakunisakya

yiingabha nikabhakorera ebhitiika bhyaaru kwe emyaaka miroongo ene (40).

10Kwe ekigirirye kiyo nikabhiihirirwa no orwiibhuro runo, nikabhuga,

‘Eziisiku zyoosi ni bhaatu bhano bhabhuriri muziikoro zyaabhu,

ni bhaatu bhano bhatakweenda okutuniirira eziinzira zyaane.’

11Kweego nikatiinda no okwiirahira, nikabhuga,

‘Nitakubhiikirirya na rumwe abhaatu bhayo okusikira hagiro ho okumuunya,

hano nibhanwiiri kwiiguru waabhu.’ ”3

12Abhahiiri bhaane, mwiiriihe okubha ataaza akabhaho omuutu wowoosi gatigati weenyu wuno ane ekoro embiihu, wuno atakwiikirirya, kweeki araanga okumutuniirira Taatabhugya wuno ari muhoru kirakeego. 13Nawe mwiitoongere ekoro emwe kweemwe eziisiku zyoosi zino tukubhirikira “Reero,” okubha mutaaza mukangʼeenwa ne ebhibhi no okwaanga okumwiikirirya Taatabhugya. 14Eraabhe turakora omukya okumwiisigira Taatabhugya tee obhweemero bhwo obhuhoru bhweetu, kyeego tukumwiisigira okurwa obhweemero, turi hamwe na Krisito. 15Muhiite gano gakaamirwe mu Makaamo Amahoreeru,

“Reero, hano muriigwe eriiraka rya Taatabhugya,

mutabha murazikora eziikoro zyeenyu kubha kongʼu,

kyeego bhazaazi bheenyu bhaari bhakwaanga okukaangatibhwa neenye.”4

16Angu, ni bhaatuki bhano bhiigwiiri eriiraka rya Taatabhugya, nawe bhakaanga okukaangatibhwa neewe? Mbe, bhataari bhoosi bhano bhaakaangatiibhwe na Musa okurwa mukyaaro kya Misiri? 17Kweeki, ni bhaatuki bhano Taatabhugya yabhatiindiiri kwe emyaaka miroongo ene (40)? Mbe, bhatari bhoosi bhano bhaakoriri ebhibhi no okukwa mwiitirigo? 18Kweeki, ni bhaatuki bhano Taatabhugya akiirahira kubha atakubhahaatira na rumwe kusikira ahagiro ho okumuunya hano abhanwiiri kwiiguru waabhu? Mbe, bhatari bhoosi bhano bhakaanga okumwiigwa? 19Kweego, tumenyiri kubha, abhaatu bhayo bhakatamwa kusikira ahagiro ho okumuunya, kwo okubha bhakaanga okumwiikirirya Taatabhugya.