Eriiragano Eriihya
2 Abhakoriinto 6
Bhoono, kwo okubha turakora emirimo hamwe na Taatabhugya, turabhiisasaama kubha orubhaango rwa Taatabhugya runo musuungʼaaniri, mutarutiga rubhure bhusa. Taatabhugya arabhuga mu Makaamo Amahoreeru,
“Kwe eriibhaga rino rikweenderwa, nikakwiigwa,
orusiku rwo obhutuurya, nikakusakirya.”1
Ambe itegeerera, eriibhaga rino rikweenderwa ni rino, orusiku rwo obhutuurya ni runo!
Okwiikongʼeererya mumirimo gya Taatabhugya
Tutakumukorera omuutu wowoosi engʼana yoyoosi yino ekumubhiihira, okubha obhuhokya bhweetu bhutagaambwa bhubhi. Nawe, tureerekya mumangʼana goosi kubha, etwe ni bhahokya bha Taatabhugya. Turiikongʼeererya bhukongʼu munyaako nzaru. Tutemirwe bhubhi, tubhohirwe mukibhoho, na amahizo ga abhaatu bhatumwaayiiri. Tukoriri emirimo mikongʼu, tukateengeeza no okuraambuka ne enzara. Kweeki turiiyeerekya kubha abhabhagati bha Taatabhugya kwo obhuheene, kwo obhumenyi, kwo obhwiikongʼeererya, kwo obhuzomu, kwo obhukaangati bhwe Ekoro Muhoreeru, kwo obhuseegi bhwe eheene na kwo obhurwaazi bhwa amangʼana go obhuheene. Turakora gayo goosi kwo obhuturo bhwa Taatabhugya. Eheene nikyo ekigwaato kyeetu, orubhaara rwo obhuryo na rwo obhumosi.2 Etwe turamuhokeerya Taatabhugya, abhaatu bharaatusuuke kasi kutuzeera, bharaatukumye kasi kutugaamba bhubhi. Turarorekana kubha turi bhabheehi, nawe turagaamba obhuheene. Turarorekana kya bhano tutamenyekeeni, nawe turamenyekana bhuzomu. Turarorekana kya bhano tukukwa, nawe turi bhahoru! Tutemirwe bhubhi, nawe tukyaari kwiitwa. Turarorekana kya abhaatu bhe ebhigoongi, nawe eriibhaga ryoosi tuno obhuzomererwa. Turarorekana kya abhataka, nawe tubhaniibhirye bhaaru. Turarorekana tutana kyokyoosi, nawe tune ebhigiro bhyoosi.
Emwe Abhakoriinto, tugaambiri neemwe kubhweero bhukongʼu, kwo okubha turabhaseega kwe eziikoro zyeetu zyoosi. Etwe tukyaari kutiga kubhaseega emwe, nawe emwe niimwe mutigiri kutuseega etwe. Bhoono ndagaamba neemwe kya abhaana bhaane, kubha mubhe muratuseega kwe eziikoro zyeenyu zyoosi, kyeego etwe tukubhaseega emwe.
Okugwaatana na abhaatu bhano bhatari abhiikirirya
Mutagwaatana na abhaatu bhano bhatari abhiikirirya. Mbe, eheene no obhubhi bhuratura kwiigwaana heene? Obhweero ne ekiirima bhiraturabhwi kubha hamwe? Kweeki Krisito na Beriari3 bharaturabhwi kwiigwaana? Omwiikirirya na wuno atari omwiikirirya bhano obhwiigwaanoki? Bhuriho obhwiigwaanoki gati we eriiseengerero rya Taatabhugya ne emisaambwa gyo okubhaazwa? Etwe ni iseengerero rya Taatabhugya wuno ari muhoru!4 Kyeego Taatabhugya omweene akabhuga,
“Ndiikara hamwe nabho no okugeenda gati waabhu.
Ndabha Taatabhugya waabhu, nabho bharabha abhaatu bhaane.”5
Kweego Omukuru akabhuga,
“Murwe gati waabhu, mwiiyaahure nabho.
Mutakunia kigiro ekinyaka,
niho neenye niraabhasuungʼaane.”6
Kweeki akabhuga,
“Ndabha Wuuso weenyu,
neemwe murabha abhamura na abhaakya bhaane.
Omukuru, Taatabhugya wo Obhuturo Bhwoosi abhugiri!”7
Source notes (7)
- Footnote Rora Isaya 49:8.
- Footnote Orubhaara rwo obhuryo na rwo obhumosi , obhugazuro bhwaku ni kubha, okubhoko kwo obhuryo nikwo kukugwaata ekigwaato, no okubhoko kwo obhumosi nikwo kukugwaata engubha yo okwiiriibha.
- Footnote Beriari ni riina eriindi rya Seetaani.
- Footnote Rora 1 Abhakoriinto 3:16; Abhaefeso 2:20-21.
- Footnote Rora Abharaawi 26:12; Yeremia 32:38; Ezekieri 37:27.
- Footnote Rora Isaya 52:11.
- Footnote Rora 2 Samweeri 7:14; 1 Amangʼana ge Eriibhaga 17:13.
Eriiragano Eriihya. Copyright © Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.