Biblica® Open Yoruba Contemporary Bible 2017
Saamu 114
Nígbà tí Israẹli jáde ní Ejibiti,
ilé Jakọbu láti inú ènìyàn àjèjì èdè
Juda wà ní ibi mímọ́,
Israẹli wà ní ìjọba. 1
Òkun sì rí i, ó sì wárìrì:
Jordani sì padà sẹ́yìn.
Àwọn òkè ńlá ń fò bí àgbò àti
òkè kéékèèké bí ọ̀dọ́-àgùntàn.
Kí ni ó ṣe ọ́, ìwọ Òkun, tí ìwọ fi wárìrì?
Ìwọ Jordani, tí ìwọ fi padà sẹ́yìn?
Ẹ̀yin òkè ńlá kí ló dé ti ẹ fi ń fò bí àgbò,
àti ẹ̀yin òkè kéékèèké bí ọ̀dọ́-àgùntàn?
Wárìrì, ìwọ ilẹ̀, níwájú Olúwa;
ní iwájú Ọlọ́run Jakọbu
tí ó sọ àpáta di adágún omi,
àti òkúta-ìbọn di orísun omi.
Source notes (1)
- Cross-reference El 14.21; Jo 3.16.
Biblica® Open Yoruba Contemporary Bible 2017. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.