Yohannisni raa'i 15

Koi'ni Bettoosikitonon Epho Ha'oni Wosiya

1Ooma akama dey diinqi beso samaastak biin; Ha'oosi gi'a ko'unak zaguni koi'ni naafun bettooson epho Ha'oni wosiya naafunon biin.

2Esseen orfo geya woi'to burchuqone fa baari biin. Esiisimato gonyoosonnawa gonyoosi suuranonna; dey sunbaasi faadanon neebere mere baassotin biin; Ha'oos baassok imna kaamaason ephaat burchuqone fa baarisi tesha yersefeer. 3Ha'oosi wostinynya sina Museni gaamaasonnawa fantuusa gaamanonna:

«Zuuttambaase asin chimfa Daama Ha'oose!

Wostonees akama dey diinqiwe;

Darani meeni taatono!

Ugunnees likki dey futo;

4Daamiiso! Neen digonor;

sunneeson dey ulfinsunor oonso?

Ne netu kortowa;

futoni mangsuni kar'nees ammanon kessa bestena boor'a;

daraas zuuttere yeere neeki sina sagadosonewa»

yit gaamet feeseter.

5Esseen orfo dey biin; zaalni durkani sina betemeqdesiis den samak gachche. 6Naafun bettooson epho Ha'oosi naafun wosiyanikito betemeqdesiissin kesi; kayma foro palpalu laylonini maama mayo. Nibbesiison dey warqeni talfak taar'era feeseter. 7Acheech kaabarere wuzaasikitosin isaas Ha'oni naafun wosiyaasikitok koi'baneen koi'ba foontonon kar'a fooni Ha'oosi gi'a tuumma faana naafun warqeni toofooson imi. 8Betemeqdesiis dey Ha'oosi ulfinatannawa hugnatanna kabi chowa chuwak tuumi. Ha'oosi naafun wosiyanikito ephena naafun bettoosikito ko'unanneen oonu betemeqdesiissi girunak aane chime.