Ibrawiyan 8

Yesus Gaddo Teyyaasi Maagni Gaannye Meeni Gaanynya Sinnamato

1Ese wolloni wuzaasikitosin arkiis haniiswa: Samak zuuttambaase asiistan denalo sina Ha'oosi zigimuni hoi'ta teshaasta di effetena maagni gaanynye meeni gaanynyani innok feerwa. 2Bar wostet feenaas futoni durkani sina Meqdesiissiwa. Es durkaniis toktenaas asuni kushuk sinnoynaron Daamiisikwa 3Maagni gaanynye meeni gaanynya isarba isarbaasik taattefenaas mabanewa maa'ane asin imanakwa. Es bari boor'a es maagiis dey imana isa wuzba foonak sholsuwa. 4Tumaasimato Mabaason imefe maagni meya feeseter sinna boor'a bar han daastakir sini sinfaanane maag sinana kabatawa. 5Han maagni meya wostesefe durkaniis samak fa bari besonewa yirarane asik koi'bawa. Es bar dey sinnaas Muse durkaniison wostefena kabaasik Ha'oos: «Aamaastak ammanon neek besinaasne faaron zuuttambaase mai'sira oodda zaguwa» yira ajajenaasimatowa. 6Sinuntano hash Yesus ganenir dey isar zagina teyyaas kur'u teyyaastan denalo sina abdiista yerer sinnamato barik imte wostoos dey arkirwa.

7Zeemmati teyyaas zinaba foonto sinna beste sinfaanane hepsani teyyaas sholsuna kabatawa. 8Ha'oos darabaasata zina foobaason besuk ekka yifawa:

«Ese Israelni daraasneennawa Yuudani daraasneenna;

gaddo teyyani kaama; Giruna wona yoonawa»

yifewa Daamiis.

9«Es teyyaas dey kushubesiison ephpha Giphtsini meeni daastan;

baassotin kisifana kabaasik;

baasso abaasneen girina teyyaasne faartawa.

Baasso ta teyyani kaamaasik aane yerosoto sinna boor'a;

ta dey kashshingwa»

yifewa Daamiis.

10«Ese han wonaasneen orfo;

Israelni daraasneen ane;

giruna teyyani kaamaas haniiswa;

yifewa Daamiis;

ta tumnaason baasso;

kanuussi foonak zaguna;

nibbesiissi dey tichuna.

Ta dey baassok Ha'obesi sinana;

baasso dey ta dara sinone.

11‹Daamiisin aruwa› yire wolkobaasin sinun;

aybaasin assunir oonu aafa foona wuza;

garosatan kabira hamma;

arkiisata kar'ana kabaneen;

zuuttere taan arsone.

12Mangsubesiison feeshun una;

boor'besiison dey;

aafa wolla yaadatona wuza.»

13Ese: «Gaddo teyyani kaama» yifana kabaasik sinati teyyani kaamaason kur'u zagiwa uwa. Es bari boor'a kur'i barewa kur'u wuza zuuttambaase tishuna wonaas tai'sewa.