Lusi

Chitabu chi

Che Lusi

Chilongolelo

Chitabu chi che Lusi chikusala indu yakusimonjeka iyaasime ŵapannango umo wa Ŵaisilaeli pa chipindi cha Ŵakulamula ŵa ku Isilaeli. Che Naomi juŵaliji achikulu jwa ŵapannango wu, akusimanikwa ni kuwililwa kwakukulungwa, katema ŵankwakwe ni achiŵanagwe ŵaŵili ŵachilume paŵawile ali kuchilendo ku chilambo cha ku Moabu. Pakumala yeleyo, che Naomi akupochela upile pakumala che Lusi juŵaliji jumo mwa achakwegwawo, juŵaliji jwa ku chilambo cha ku Moabu, paŵawamwiwe nsyene kwakuya akwegwawo ni kwakamuchisya. Che Naomi akulongana ni che Lusi pa ulendo wa kuuja ku chilambo chakwe cha ku Isilaeli. Pakumala pelepo che Lusi ni che Naomi, ŵanawose akulisimana achipochelaga upile apala che Boasi, jumo mwa ŵapaulongo wakuŵandika wa ŵapannango wa che Naomi paŵawamwiwe kwagosa ni kukunda kulombela che Lusi. Katema ka Ŵakulamula kaliji katema changalumbana ligongo Ŵaisilaeli ŵali ŵajinji ŵatemi pangali kugakamulisya malajisyo, nambo che Naomi, ni che Lusi ni che Boasi ŵaliji chisyasyo chambone kwa Ŵaisilaeli ŵaŵatamaga ali nkugakamulisya ni kugakuya malajisyo ga Akunnungu.

Ngapagwa jwalijose jwakwimanyilila mundu juŵalembile chitabu chi che Lusi. Lyuŵa liŵalembile chitabu chi nombe ngalikumnyika nambo achajinji akuganichisya kuti chitabu chi chalembekwe pakumala Ŵaisilaeli kutyoka ku usami malinga ni Chiebulania chachitumiche pa kulemba chitabu chi. Chindu chachili cha maana kwannope ni kuti mwenye che Daudi ŵaliji chisukulu chi che Lusi, jwankongwe juŵaliji ngaŵa Mwisilaeli. Chelechi malumbo gakwe kuti jwankongwe ju nombe akwete lipesa pa achachekulu wa mu lukosyo lwa che Yesu. Chelechi chindu chi chikusala usyene kuti, Akunnungu ngakusagula malinga ni ŵapaulongo, nambo akusagula malinga ni ntima wa mundu.

Yaili mwelemo

Ngani sya ŵapannango wa che Naomi ni kuwililwa kwakukulungwa kukwasimene, che Naomi ni che Lusi iŵatite kuuja ku Isilaeli, mukusalikwa mu sula ja 1.

Che Lusi iŵatite kusimana ni che Boasi paŵaliji nkwimilila masengo ga kugungula ku ngunda wakwe. Che Lusi ŵaliji nkulokota maŵasaŵasa ga magungulo mu ngunda pakumala ŵakugungula kusonganganya magungulo, mukusalikwa mu sula ja 2.

Che Naomi iŵatite kunnajisya che Lusi ansache che Boasi kuti ŵalombele ni kwagosa ligongo ŵaliji jwa paulongo wakuŵandichila malinga ni kulombekana. Che Boasi ŵakundile kuchitenda chele chindu cho, mukusalikwa mu sula ja 3

Che Boasi iŵatite kuuwombola ngunda uwaliji wa malehemu ŵankwakwe che Naomi, ni sooni kulombela che Lusi, mukusalikwa mu sula ja 4.