Kuŵalanga

Kuŵalanga

Chitabu cha Kuŵalanga chichalembekwe ni Musa

Kuŵalanga

Chilongolelo

Chitabu cha Kuŵalanga chikukunguluchila ulendo wa yaka alobaini kwa Ŵaisilaeli kupitila mwipululu, akanaŵe kwinjila mu chilambo chiŵalanjilwe yaani chilambo cha ku Kanaani. Chitabu chi chikuŵilanjikwa Kuŵalanga pakuŵa kwana mauto gaŵili gagakusala hesabu ja achalume ŵaŵaputanaga ngondo ŵaŵaliji mu kila lukosyo lwa Ŵaisilaeli. (Sula ja 1 ni sula ja 26) Ŵaumanyilisi akumanyilila yakuti chitabu cha Kuŵalanga chili chitabu chimo mwa itabu ya malamulo yailembekwe ni che Musa yaani Ndanadililo, Kutyoka, Indu yapanganyisye Ŵalawi, ni Chikumbuchisyo cha malamulo. Usyene wu ukuloleka mu chitabu chisyene cha Kuŵalanga apala pachikutanda kwa kusala kuti Ambuje Akunnungu ŵakungulwiche ni che Musa. (Kuŵalanga 1.1) Ikukomboleka nombe che Musa ŵalembile mwamujinji mu chitabu cha Kuŵalanga ni ŵakulemba ŵa malembo ŵajonjechesye malo gampepe mu yaka iyakuiye. Ikuŵa yakulimba kuganisya kuti che Musa akakombwele kulilembela nsyene kulilapa kulitulusya kwakwe mu liunjili lya 12.3.

Ulendo wao wa mwipululu, Ŵaisilaeli ŵalalatile ni kunkana Ambuje Akunnungu kakajinji, nombewo ŵajamuchikwe kwa ipanganyo yao. Chisyayo chimo nkati chindu cho, chili katema ŵandu ŵa Isilaeli paŵajogopaga ni kulalata kuti Ŵakanaani akwete machili gamakulungwa kwapunda ŵanyawo (Kuŵalanga 14:1-4). Malinga ni chindu cho Akunnungu ŵatite uŵelesi wu wose wa Ŵaisilaeli ngaajinjila mu chilambo chiŵalanjilwe. Kaichile katema nombe che Musa nsyene nganiŵajitichisya Akunnungu, ni malinga ni yele nganajinjila mu chilambo chiŵalanjilwe. Namose yeleyo ŵandu ŵajendelechele kwakana Akunnungu, nambo Akunnungu ŵajendelechele kwagosa. Katema ŵammagongo ŵa Ŵaisilaeli paŵanjigele jwakulondola jwaunami jwakuŵilanjikwa cha Balaamu asale maloŵe gakwalwesya Ŵaisilaeli, Akunnungu ŵantesile che Balaamu asale maloŵe gakwapa upile pamalo pa kwalwesya. (Kuŵalanga 22-24)

Yaili mwelemo

Ngani jankati kuŵalanjikwa kwa Ŵaisilaeli ni ukotopasyo ŵa chigono chao, masengo ga ŵambopesi ni mbopesi sisyatyochekwe ni kila lukosyo katema chilisa ni Lisakasa lya kupopelela payatendekwe kuŵa ya Ambuje Akunnungu. Mu sula jaandanda mpaka sula ja kumi msitali wa kumi na moja.

Pakumala yeleyo chitabu cha Kuŵalanga chikusalilichisya ulendo wa ŵandu ŵa Isilaeli mu chipululu. Mu sula ja kumi msitali wa kumi na mbili mpaka mu sula ja ishilini na tano.

Kuŵalanjikwa kwaaŵili kwa Ŵaisilaeli ni malajisyo gane pamo ni meena ga mauto gaŵaŵisile igono Ŵaisilaeli ali mu ulendo wakwaula ku chilambo chiŵalanjilwe, ni itajile kuchigaŵanya chilambo cho kwa ngosyo syose, katema katajinjile mu chilambo chao achinsyene. Mu sula ja ishilini na sita mpaka sula ja selasini na sita.