Ŵakulamula

Chitabu cha

Ŵakulamula

Chilongolelo

Chitabu cha ŵakulamula chikutusalila ndaŵi ja Ŵaisilaeli pakumala kuchigungumuchila ni kuchijigala chilambo cha ku Kanaani kuŵa chao. Chipindi chi Ŵaisilaeli ŵaliji nkuujilaujila kwaleka Akunnungu, ni Akunnungu nombe ŵaakulupusyaga. Kakajinji, Ŵaisilaeli akatandite kuipopolela inyago ya minungu, nipele Akunnungu akaajimiche ŵandu ŵa ilambo ine aiche kukwalagasya. Pakumala ŵandu ŵa ilambo ine kwalagasya, ŵandu ŵatandite sooni kulila ni kwaujilila Akunnungu ni Akunnungu nombe ŵaliji nkwaŵichila ilongola ŵaŵaŵilanjikwe “Ŵakulamula,” kuti ŵaalongosye ŵandu, ŵaatyosye kwa ŵandu wo.

Ngapagwa mundu jwakumanyilila kusyene kuti nduni jwalembile chitababu cha Ŵakulamula. Ŵandu ŵajinji kwa kugakuya mapochelo gakupisyangana pisyangana, ŵakulupilile kuti jwakulondola che Samweli ni juŵalembile, nambo tukukombola kuŵa ni usyene kuti chalembekwe katema Ŵaisilaeli ali ni mwenye, pakuŵa chitabu chikulosya mwamujinji kuti Ŵaisilaeli nganakola mwenye mu sula ja 17:6; ni sula ja 18:1; ni sula ja 19:1; ni sula ja 21:25. Iŵaga ndema sya Ŵaisilaeli kukopoka ku Misili syaliji pa chaka cha 1400 Akanaŵe kupagwa Kilisto, nnolechesye mu chilongolelo cha chitabu cha Kutyoka kwa kusalichisya nnope, nipele ikukomboleka indu yaipanganyisye ŵakulamula yaliji pasikati ja chaka cha 1300 mpaka 1050 Akanaŵe kupagwa Kilisto, katema paŵasagulikwe che Sauli kuŵa mwenye jwa ku Isilaeli.

Yaili mwelemo

Ngani sya ngondo jambesi pasikati ja Ŵaisilaeli ni Ŵakanaani pakumala kuwa che Yoshua. Iyoyo peyo sikusala nkati ndema sya ŵakulamula katema Akunnungu paŵaasagulile ilongola ŵaŵaalongwesya ni kwakulupusya Ŵaisilaeli atyoche mmakono mwa ŵammagongo ŵao, mu sula ja 1 mpaka sula ja 3:6

Ngani sya ŵakulamula ŵakupisyangana ŵaŵaŵichikwe ni Akunnungu kwakamuchisya Ŵaisilaeli mu sula ja 3:7 mpaka sula ja 16:31.

Ngani sya utindiganyo wine wautesile Ŵaisilaeli mu sula ja 17 mpaka sula ja 21.