Chikumbuchisyo cha Malajisyo

Chikumbuchisyo cha

Malajisyo

Chilongolelo

Chitabu cha chikumbuchisyo cha malajisyo chikuujila malajisyo gagatyosyekwe mu itabu ine ya malajisyo, yaani itabu nsano yaandanda mu Lilangano Lyakalakala yaikuŵilanjikwa Pentetuti. Mu Chiebulania liina lya chitabu chi malumbo gakwe “Maloŵe.” Ikukulupilichika kuti che Musa ni juŵalembile chitabu chi, ikaŵe liunjili lyalinandi lyakumbesi lyalikukunguluchila chiwa chao. Chitabu chi chikutanda kwakuti, “Gelega gali maloŵe ga che Musa gaŵasalile Ŵaisilaeli.” Indu yaikulosya kuti che Musa ni juŵalembile chitabu chi ikuloleka sooni mmalo gampepe mu Lilangano lya Sambano. Chisau mu chitabu cha masengo ga achinduna mu sula ja 3:22-23, che Petulo paakujila maloŵe gagali mu Chikumbuchisyo cha Malajisyo mu sula ja 18:15-18 ni alembile kwakuti gelega galiji maloŵe ga che Musa. Ikukomboleka kuti che Musa ni juŵalembile chitabu chi pamo ni chitabu cha Ndandililo ni Kutyoka ni Indu yapanganyisye Ŵalawi ni chitabu cha Kuŵalanga pasikati ja yaka 1300 pane 1400 Akanaŵe kupagwa Kilisito.

Chitabu cha Chikumbuchisyo cha Malajisyo chalembekwe mpela majilano pasikati ja mwenye jumo ni umwenye wine wakuutawala, mpela iyatite kutendekwa kalakala. Lili lilangano pasikati ja Akunnungu ni ŵandu ŵa ku Isilaeli. Akunnungu ŵakundile kwapa upile ŵandu, naga akakundile kugakuya ni kugapilikanichisya malajisyo gakwe. Iŵaga Ŵaisilaeli akakanile kwitichisya malajisyo ga Akunnungu akajamwikwe. Chelechi chili chindu chekulungwa chachisalilikwe mwamujinji mu chitabu chi chose, nambo nnopennope mu sula ja 27 mpaka sula ja 28, sikusalichisya au usyene wu sichilosyaga upile wajikajika ni malweso gagakwika kwa ligongo lya kwitichisya pane ungajitichisya wa ŵandu ŵa ku Isilaeli. Ngosyo syakupisyangana sya Ŵaisilaeli syajimi pa matumbi gaŵili gakupisyangana gagakulolegana, katema ŵane akupeleka upile ni ŵane akulwesya kwa kunyanyisya, kulosya kuti alikundile lilangano.

Yaili mwelemo

Che Musa akukumbuchisya iyasimene Ŵaisilaeli paŵajendaga mwipululu, mu sula jandanda mpaka sula jaatatu.

Iyasachilwaga mu lilangano pasikati ja Akunnungu ni ŵandu ŵakwe, mu sula ja ncheche mpaka ja ishilini na sita.

Ŵaisilaeli akuŵecheta upile ni malweso kwa kunyanyisya, kulosya kuti kutyochela pelepo lilangano likupanganya masengo, mu sula ja ishilini na saba mpaka sula ja selasini.

Kumbesi che Musa akuŵecheta maloŵe gakumalichisya ku che Yoshua ni kwa kila lukosyo lwa Ŵaisilaeli akanaŵe kuwa, mu sula ja selasini na moja mpaka sula ja selasini na nne.