2 Samweli

2 Samweli

Chitabu chaaŵili chi che Samweli

Chilongolelo

Itabu ya 1 Samweli ni 2 Samweli kuundanda yaliji chitabu chimo chichamanyikaga nti “Chitabu cha Samweli.” Pa ulendo waandanda chitabu chi chagaŵikwe ni kuŵa itabu iŵili pa litoleo lyalikuŵilanjikwa, “Litoleo lya Seputuaginti”. Lyeleli lyaliji litoleo lyakuundanda lya tafusili ja Lilangano lya Kalakala mu chiŵecheto cha Chiyunani. Liina lya tafusili jo lyajigele malumbo gakuti tafusili jo jaŵichikwe chile ni ŵakusyoma 70 pane 72 ŵa Chiyahudi. Mu tafusili ja Chigiliki ji, itabu ya 1 Samweli na 2 Samweli yaŵilanjikwe 1 umwenye ni 2 umwenye, ni mu litoleo lya Chilatini lilyakuiye pakumala lyelelyo, itabu yo yagalawiche ni kuŵilanjikwa 1 Mamwenye ni 2 Mamwenye. Kwayele itabu yaikumanyika lelojino nti 1 Mamwenye ni 2 Mamwenye yaŵilanjikwe 3 Mamwenye ni 4 Mamwenye. Itabu ya 1 Samweli na 2 Samweli ikusala nkati utame wa jwakulondola jwa Akunnungu che Samweli, mwenye che Sauli, ni mwenye che Daudi. Che Samweli ŵaliji chilongola jwambesi katema chilambo cha ku Isilaeli pachatyosile kulongoswa ni ŵakulamula ni kutanda kulongoswa ni mamwenye. Che Samweli jujojo ni juŵaajitilile mauta che Sauli ni che Daudi kuti aŵanje mamwenye ŵaŵili ŵaandanda ku Isilaeli. Itabu ya 1 Samweli ni 2 Samweli ikusalichisya indu ya chihisitolia ya chilambo cha ku Isilaeli pa chipindi cho.

Ngapangwa jwakummanyilila juŵalembile itabu ya 1 Samweli ni 2 Samweli. Jwakulemba nganalisala nsyene mu itabu yo, nambo panepa ŵaliji jwanjumi pa chipindi chose cha utawala wa mwenye che Daudi, ni panepa ŵaliji chiŵela jwanjumi namose pakumala utawala wo, nombe panepa ŵaliji ni ukombole wa kulola ni kusyoma ikalata ine iyasalaga nkati ndamo sya che Sauli ni che Samweli. Kwalingongo lya ungamanyika wa mundu pane ŵandu ŵalembile itabu yi, ungamanyika wo utesile itabu yi ikamanyika kuti yalembekwe chakachi.

Yaili mwelemo

Che Daudi iŵatite kuŵa mwenye jwa ku Yuda ni kanyuma ŵaliji mwenye jwa ku Isilaeli jose, mu sula ja 1 mpaka sula ja 5.

Che Daudi iŵatite pakutawala mpela mwenye ni kwapunda achajinji mwa ŵammagongo ŵakwe mu sula ja 6 mpaka sula ja 10.

Che Daudi iŵatesile sambi ja chikululu ni kuulaga, ni iŵatite kwamukwa ni jwakulondola jwa Akunnungu che Natani mu sula ja 11 mpaka sula ja 12.

Che Daudi iŵatite pakugalaukwa pa ulendo waandanda ni waaŵili mu sula 13 mpaka sula ja 20.

Maloŵe gambesi gagakusala ngani sya utawala wa che Daudi ali mwenye mu sula ja 22 mpaka sula ja 24.