2 Mamwenye

Mamwenye

Chilongolelo

Itabu ya mamwenye ŵaandanda ni ŵaaiŵili ikusala nkati kila mwenye jwa ku Isilaeli ni jwa ku Yuda kutandilila katema umwenye wa che Sulemani, katema yele ilambo iŵili yo ili chiŵela ikamulangene. Itabu ya mamwenye ŵaandanda ni ŵaaŵili, yanayose ikusala nkati umwenye wa ku Isilaeli uwakamulene iyatite kugaŵanyika ni kuŵa mwenye siŵili sisyakuyaga majendo gakulekangana, mpaka mwenye siŵili syo pasyalepele kwa ŵandu ŵa ilambo ine ni ŵandu ŵakwe kujigalikwa ku usami ku ilambo ya chilendo. Jwakulemba akulolesya kila mwenye mu umwenye ŵakwe iŵatite kukamulangana ni Ambuje Akunnungu ni iŵaga ŵankuiye kusyene pane ngwamba. Mamwenye ŵane ŵatesile, “Yaikwanonyelesya Ambuje Akunnungu.” (2 Mamwenye 18:3) Ŵane ŵatesile, “Yangalumbana paujo pa Akunnungu.” (2 Mamwenye 21:2) Jwakulemba akusalilisya nnopennope ngani sya umwenye wa mamwenye ŵaŵatendaga yaikwanonyelesya Ambuje Akunnungu, ni kulosya kuti indu iyajendelaga yambone mu kila ntundu yatyochelaga ni ukulupilichiko wa mwenye jo kwa Akunnungu. Mu chitabu cha 2 mamwenye sula ja 17 msitali wa saba, tukusyoma kuti Ŵaisilaeli ŵajigalikwe ku usami mu ilambo ya chilendo nti achikapolo, ni indu yo yatyochele pakuŵa “Ŵaisilaeli ŵantendele sambi Ambuje Akunnungu,” nombe ligongo “Ŵaipopelele minungu jine.”

Yaili mwelemo

Mu sula jaandanda mpaka sula ja nane msitali wa kumi na tano jikusala nkati iyatyochele kumbesi kwa utumiche wa jwakulondola che Elia nombe utumiche u che Elisha jwakulijiganya jwakwe ni juŵatumiche badala jakwe.

Mu sula ja nane msitali wa kumi na sita mpaka wa kumi na saba tukusyoma ngani sya mamwenye ŵane ŵa ku Isilaeli ni ŵa ku Yuda ni ngani sya ŵandu ŵa ku Isilaeli ŵaŵajigalikwe ku usami ku ukapolo.

Mu sula ja kumi na nane mpaka ja ishilini ngani ja umwenye wa che Hesekia mwenye jwa ku Yuda ni iŵatite pakwakuya ni kunjitichisya Ambuje Akunnungu.

Mu sula ja ishilini na moja mpaka sula ja ishilini na tano jikusala ngani ja mamwenye ŵa kumbesi ŵaŵatawele ku chilambo cha Yuda, ni ŵandu ŵa chilambo cho iŵatite pagungumuchilwa ni kujigalikwa migole ni kwajausya ku ukapolo akula ku Babeli.