1 Samweli

1 Samweli

Chitabu chaandanda chi che Samweli

Chilongolelo

Itabu ya 1 Samweli ni 2 Samweli kuundanda yaliji chitabu chimo chichamanyikaga nti “Chitabu cha Samweli.” Pa ulendo waandanda chitabu chi chagaŵikwe ni kuŵa itabu iŵili pa litoleo lyalikuŵilanjikwa, “Litoleo lya Septuaginti.” Lyeleli lyaliji litoleo lyakuundanda lya tafusili ja Lilangano lya Kalakala mu chiŵecheto cha Chiyunani. Liina lya tafusili jo lyajigele malumbo gakuti tafusili jo jaŵichikwe chile ni ŵakusyoma 70 pane 72 ŵa Chigiliki. Mu tafusili ja Chigiliki ji, itabu ya 1 Samweli na 2 Samweli yaŵilanjikwe 1 Falme ni 2 Falme, ni mu litoleo lya Chilatini lilyakuiye pakumala lyelelyo, itabu yo yagalawiche ni kuŵilanjikwa 1 Mamwenye ni 2 Mamwenye. Kwayele itabu yaikumanyika lelojino nti 1 Mamwenye ni 2 Mamwenye yaŵilanjikwe mu litoleo lyo, 3 Mamwenye ni 4 Mamwenye. Itabu ya 1 Samweli na 2 Samweli ijigele ipanganyo ya chihisitolia nkati utame wa jwakulondola jwa Akunnungu che Samweli, mwenye che Sauli, ni mwenye che Daudi. Che Samweli ŵaliji chilongola jwambesi katema chilambo cha ku Isilaeli pachatyosile kulongoswa ni ŵakulamula ni kutanda kulongoswa ni mamwenye. Che Samweli jujojo ni juŵaajitilile mauta che Sauli ni che Daudi kuŵa mamwenye ŵaŵili ŵakuundanda ŵa ku Isilaeli. Itabu ya 1 Samweli ni 2 Samweli ikusalichisya indu ya chihisitolia ya chilambo cha ku Isilaeli pa chipindi cho.

Ngapangwa jwakummanyilila juŵalembile itabu ya 1 Samweli ni 2 Samweli. Jwakulemba nganalisala nsyene mu itabu yo, nambo panepa ŵaliji jwanjumi pa chipindi chose cha utawala wa mwenye che Daudi, ni panepa ŵaliji chiŵela jwanjumi namose pakumala utawala wo, nombe panepa ŵakombwele kupata itabu ine iyasalaga nkati umi u che Sauli ni che Samweli ni kusyoma. Kwaligongo lya kusisika nnope nkati mundu pane ŵandu ŵalembile itabu yi, sooni ngaikumanyika itabu yi yalembekwe chakachi.

Yaili mwelemo

Kupagwa ni kuŵilanjikwa kwa jwakulondola jwa Akunnungu che Samweli pa kwatumichila Akunnungu, mu sula 1 mpaka sula ja 3.

Ŵafilisiti iŵatite kwigala lisanduku lya lilangano lya Akunnungu kutyochela kwa Ŵaisilaeli, ni ilyatite kwikanawo maulago kwa misi ja Ŵafilisiti katema palyaliji mu misi jao, mu sula ja 4 mpaka sula ja 7.

Ŵaisilaeli iŵasachile akole ni mwenye, ni sooni che Samweli iŵatite pakwajitilila mauta che Sauli aŵe mwenye ŵaandanda ni Akunnungu iŵatite pakwakana che Sauli kanyuma, mu sura ja 8 mpaka sula ja 15.

Che Samweli iŵatite pakwajitilila mauta che Daudi aŵe mwenye jwaaŵili jwa ku Isilaeli ni che Sauli iŵatite pakulinga mpaka mbesi ja umi wakwe kwaulaga che Daudi, mu sula ja 16 mpaka sula ja 31.