Bible Iyansi

ƐBƐLYƆ 8

Yɛsu, undweer a angaŋ

Kyekà, le kiin a indiir itɛɛnà bi alà: Bi ibye anà undweer a angaŋ a tub awà, nde mbuur kàkàbwaay u kɔɔ ibaal a kir a imwol a làkoo a Nzam. Nde wàmukyer ingaŋ ande kà idwà anà ntɛn a ndandaa kàkyer Mwol, wɛɛ mpa kàkyer mbuur.

Undweer a angaŋ bàfun'sà ntɔn mupà an'kab anà ibɔɔn akà Nzam. Abun, yà ndöŋ naa nde sye ukäl anà undiir mwɛy mupà. Kya nde kàlàkal u mɛɛn, nde kàlàkal anki itàkal ngaŋ, ntɔn angaŋ bà paa, ba bàfàpà an'kab mulab nswɛɛŋ a Un'kɔɔn. Wɛɛ ba, ingaŋ aba bàfàkyer uboo a idwà akyà ikwom, munii a idwà a ndandaa akyà u du, asànaa nswɛɛŋ a Nzam kàwɛl Mɔsɛ ntɔn mutɔŋ ntɛn a nköŋ:

« Indiir byanswà ngye ayàkyer asànaa baswɛŋ bya u du a mɔŋ. »

Wɛɛ apanà, Yɛsu kan'wal isal aŋàsöön ubwaŋ, ntɔn nde wà mfurbo a nkwà aŋàsöön ubwaŋ, yan'bwaay udu a ilää aŋàsöön ubwaŋ. Ntɔn, yàlàkal naa nkwà atàtwɛb yàkäl anki anà an'pɛl, ndöŋ yàlàkal anki mukiir yàyweel. Kyekà, muswaŋ naa nkwà atàtwɛb ye anà an'pɛl, Nzam atɛɛnà a un'sɛŋ ande naa:

« Ilä byàmuyà,

abyà in'yàdyà mɛ nkwà akün

anà un'sɛŋ a Isàlɛl anà wà Yudà.

« Wɛɛ, ya isàkal anki asànaa nkwà kàdi mɛ anà ankaa aba

mpal katɛ mɛ mpi u kɔɔ ntɔn mukatwey u Ngipiti.

Ntɔn ba ŋakwo bàläm anki uboo a nkwà amɛ,

abun, mɛ sye wakapɛ ngö.

« Ntɔn, le nkwà in'sàdyà mɛ anà un'sɛŋ a Isàlɛl

ungö a ilä abin ayi:

mɛ in'sàsà in'kɔɔn amɛ unsà an'kyän aba,

mɛ in'sàsɔn mya u mpem aba:

Mɛ in'sàkal Nzam aba, ba bàsàkal un'sɛŋ amɛ.

Akà mbuur mwɛy usàkal anki anà ndöŋ mukyään mbääb ande itàkal un'tɔŋ ande

mutɛn naa: "Un'yöb Mwol!"

Ntɔn baar banswà bàkyer asan'yöb, sɛmà umbɛy tii akà undweer.

Ntɔn mɛ in'sàdwa nkul a ibii aba, mɛ in'fàsàyɔbà anki man'be aba. »

Abun, Mwol kàbel nde nkwà ayi naa nkwà akün, iswaŋà naa yàtàtwɛb nde kàbuul undiir itaan. Kyekà, undiir usàbulà wà itaan anà usànün, wa wà tsütsü muyaalà.

Bible Iyansi. Copyright © 2024 Seed Company in coordination with Forum Communautaire des Traducteurs de la Bible et Alphabétisation. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.