Roma

SURANA PAUL

TO JAMAʼA I

ROMA

POGAU BHAA-BHAANA

Sapadhana apakawaaka salamuna to manga miana jamaʼa i Kota Roma tee apaumbaaka pokaiana doʼana to manga incia, Paul apogauakamo antona fikirina surana sii: "Tee Lele Malape sumai, Aulataʼala asusuakea tuaapa o pokaiana maanusia tee Aulataʼala amembali apomalape; carana siitumo tee taparacaea tee Aulataʼala minaaka i auwalina sakawana i kapadhaana" (1:17).

Sapadhana incia sumai i pasala 1-4 Paul apetulatulaakamo maʼanana antona fikirina surana sumai. Paul apogau ande bhari-bharia mia -- malape miana Yahudi atawa mia inda motolentuna miana Yahudi -- tabeana apekalapea o pokaiana tee Aulataʼala, roonamo bhari-bharia adhaangia i nuncana kuasana dosa. Pokaiana maanusia tee Aulataʼala bheapomalape, ande o maanusia aparacaea tee Isa Al Masi. Kasiimpo Paul apetulatulaaka dhadhi bhaau inamisina maanusia ande aposaangu tee Al Masi. Dhadhi bhaau sumai bheahanda ajulu roonamo kadhaangiana pokaia mobhaau tee Aulataʼala. Mia moparacaeana tee Isa bheadhadhi malape tee Aulataʼala, tee o Rohina Aulataʼala bheapabebasia minaaka i kuasana dosa tee mate. I nuncana pasala 5-8 Paul apajelasiaka maʼanana manga hukumuna Aulataʼala tee Rohina Aulataʼala i nuncana dhadhina manga mia moparacaea. Kasiimpo i pasala 9-11 Paul apajelasiakea ande o miana Yahudi tee mia inda motolentuna miana Yahudi apesua i nuncana haejatina Aulataʼala to uumatina maanusia. Paul apajelasiakea ande o miana Yahudi momendeuna Isa padhamo apesua i nuncana haejatina Aulataʼala to atulungiaka manga mia inda motolentuna miana Yahudi tee rahumatina alaloi Isa Al Masi. Paul ayaakini ande o miana Yahudi inda bheatorotorosu amendeu Isa. Sumaimo i pasala 12-15 Paul aburiakea mamudhaakana o mia amataua tuaapa o carana to tadhadhiaka mboomo laengana mia moosena Al Masi; mofaraluuna mpuu i nuncana sura incia sii satotuuna tuaapa o carana tadhadhi tee kaasi i nuncana pokaiata tee mia mosagaanana. Rampaakanamo sumai o Paul apili mofaraluuna mpuu, siitumo: tuaapa o carana talaiani Aulataʼala, opea iwaajibuakana mia moosena Al Masi to lipuna tee opea iwaajibuakata podho-podho ingkita o mia moosena Al Masi, tee o urusa mosagaanana pokaiana tee antona ngangaranda. I pasala 15-16 Paul atutubhi surana sii tee kasameana karona to manga sabhangkana tee sagala kapujia to Aulataʼala.

Antona

Paul Apakoleleaka Surana to Manga Mia Moparacaeana i Kota Roma

Kadhaangiana Maanusia i Aroana Aulataʼala

Dhalana Kasalaamati minaaka i Aulataʼala

Dhadhi Bhaau Rampaakanamo Tadhadhi Taposaangu tee Isa Al Masi

Haejatina Aulataʼala to Uumatina Israel

Carana Tadhadhi Tamembali Mia Moosena Al Masi

Pogau Kapadhaa tee Salamuna Paul