Zaburu 62

Namisi Momalimua i Saripina Aulataʼala

62:1-13

1To kapalana molaguna.

Mboomo: Yedutun. Zaburuna Daud.

2Tangkanamo i saripina Aulataʼala o namisiku amalimua,

minaakamo i Incia o kasalaamatiku.

3Tangkanamo Incia gunu bhatuku tee mopasalaamatiaku,

Incia mboomo kota bente moewaakaaku, iaku inda bhekukohudha sampeampearo.

4Sakawana naepia ingkomiu uhumbuni mia?

E bhari-bharikomiu, buaka ingkomiu bheubhebhe mia ihumbunimiu,

mboomo ubhebhe rindi mobhele tee tondo momakasuna motobhata?

5Manga incia tangkanamo ahaejati to apasabua minaaka i kauncuramakana momalangana,

manga incia sadia agau-gau,

tee o muncuna manga incia aemani barakati,

maka i nuncana ngangarandana apekatunda. Sela1

6E ngangarandaku, tangkanamo i Aulataʼala o namisiku amalimua

roonamo tangkanamo Incia iharapuku.

7Tangkanamo Incia o gunu bhatuku tee mopasalaamatiaku,

Incia o benteku, iaku inda bhekukohudha.

8Aulataʼala modhawuaku kasalaamati tee mopamembaliaku kumulia,

Incia o gunu bhatuku momakaa tee o tampana peulusaku.

9E manga witinai, sadiamo uparacaea i Aulataʼala,

palimbamea antona ngangarandamu i aroana,

sababuna Incia o tampana peulusata. Sela

10Mia mohina mboomo sampearo poinunca,

tee o mia momulia inda amembali atoparacaea.

Atotimbangi manga incia bhari-bharia amagaagaa,

alabhi o kagaa-gaana minaaka i ngalu.

11Bholi uparacaea tee hasili ipotibhaakamiu minaaka i uhanda mia,

tee bholi uharapuaka harataa irampasi.

Ande o harataamiu ajulu o kabharina,

incamu bholi aposaronaka i harataamiu sumai.

12Sampearo Aulataʼala afirimani,

rua giu irangoku,

siitumo ande o kuasa minaaka i Aulataʼala, 132

tee minaaka i Ingkoo uka o kaasi molagina, e Kawasana Opu.

Roonamo Ingkoo mobalasina bhari-bharia mia

apokana mboomo ipewauna.