Zaburu 56

I Nuncana Kanarakaa, Taharapu i Aulataʼala

56:1-14

11

To kapalana molaguna.

Mboomo lagu: Manu-manu jarajara mopopoteona i puuna kau tarbantin2 momaridho. Zaburuna Daud wakutuuna miana Filistin arako incia i Gat.

2E Kawasana Opu, maasiakaaku roonamo manga mia alanda-landakiaku

tee saeoa apisakiaku.

3Manga musuku sadia alanda-landakiaku,

abhari mia moewangiaku, e Aulataʼala Momalanga!

4I wakutuuna kumaeka,

kuparacaea i Ingkoo.

5Iaku kupuji firimanina Aulataʼala,

tee kuparacaea i Aulataʼala, siitumo inda bhekumaeka.

Opea momembalina ipewauna maanusia to iaku? Inda dhaangia!

6Saeoa musuku apatiipambuli pogauku,

bhari-bharia haejatina manga incia to iaku amadhaki.

7Manga incia aporomusaka tee apeopo,

alukuti bhengkalaku,

tee ahaejati apekamateaku.

8Balasia manga incia to kadhakina ipewauna;

e Kawasana Opu, patobhatamea manga lipu tee amaramu!

9Ingkoo umataua saopea kabharina kanarakaaku,

Udhika loluku i nuncana butolomu.

Buaka bhari-bharia dhaangia i nuncana kitabimu?

10Sumaimo manga musuku bheasowo

i wakutuuna kugora.

Tee mboo sumai, kumataua

ande Aulataʼala aewaakaaku.

11Iaku kupogauaka kalape to KAWASANA OPU tee kupuji firimanina,

roonamo Aulataʼala adhawu janji momalape.

12Iaku kuparacaea i Incia, siitumo iaku inda bhekumaeka.

Opea momembalina ipewauna maanusia to iaku?

13E Aulataʼala, kuwaajibu bhekupewaua tolauna oniku tee Ingkoo,

bhekupasombaaka kurubani kasukuru i Ingkoo.

14Sababuna Ingkoo upasalaamatiaku minaaka i mate,

tee ujaganiaku sabutuna inda kutosunu.

Tee mboo sumai, iaku kumembali kulingka i aroana Aulataʼala

i nuncana kainawana dhadhi.