Kitabi Momangkilona Wolio
Zaburu 53
Kadhakina Maanusia Inda Moparacaeana Kawasana Opu
53:1-7
To kapalana molaguna.
Mboomo laguna kanarakaa. Lagu kaadharina Daud.1 23
Mia mokabhongo-bhongo apogau i nuncana ngangarandana,
"Inda dhaangia o Aulataʼala."
Pewauna manga incia amadhaki tee atomarika,
inda dhaangia mopewauna kalape.
Minaaka i sorogaa, Aulataʼala
atonto anana maanusia,
to akamata ara dhaangia o mia moʼaarifu,
mopeelona Aulataʼala.
Bhari-bharia mia abholi dhala mobanara tee akarajaa giu momadhaki.
Inda dhaangia mopewauna kalape,
moomini samia uka.
Firimanina Aulataʼala, "Buaka apesua i akala, ande manga mia mopewauna kadhaki inda amatau giu momalape?
Manga incia apekaoge karona tee akande uumatiku mboomo akande roti,
tee inda adoʼa i Iaku."
Maka iwe sumai manga incia bheamaeka mpuu,
garaaka inda dhaangia o giu imaeka!
Sababuna Aulataʼala apekantale bukuna manga mia moewangiko.
Ingkoo bheupekatalo tee upekaea manga incia, sababuna o Aulataʼala amendeu manga incia.
Maasangia o kasalaamati to miana Israel aumba minaaka i Sion, kotana Aulataʼala!
Wakutuuna Aulataʼala apambuli kadhaangiana uumatina,
siwuluna Yakub bheamasanaa o namisina tee o miana Israel bheakaunde-unde.
Source notes (3)
- Footnote Zaburu incia sii apokana tee Zaburu 14, somanamo dhaangia tee posalana.
- Cross-reference Rom. 3:10-12.
- Cross-reference Zab. 14.
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.