Zaburu 50

Ibaadati Mobanara

50:1-23

1Zaburuna Asaf.1

KAWASANA OPU, Aulataʼala Mokokuasana Mpuu, afirimani

tee agoraaka saangua alamu minaaka i timbu sakawana i bhara.

2Minaaka i kota Sion momakesa mpuu,

Aulataʼala apatiumba karona mboomo cahea.

3Aulataʼalata aumba tee inda soo akatongo-tongo;

waa imangauaka dhaangia i aroana,

tee garura2 momakaa dhaangia i saripina.

4Incia agoraaka laiana tee alamu

to amembali sakusii wakutuuna aʼadili uumatina.

5Firimanina, "Romusakaakaaku bhari-bharia uumatiku mosaalihi i aroaku,

siitumo manga incia mopadhana mobokena pojanjia tee Iaku alaloi kurubani isumbele."

6Laiana apakoleleaka kabanarana,

roonamo o karona Aulataʼala moʼadilina uumatina. Sela

7"Rangoa e uumatiku, Iaku bhekufirimani!

E Israel, Iaku bhekumembali sakusii tee opea mopadhana ipewaumu,

Iakumo o Kawasana Opu, Aulataʼalamu!

8Mencuana rampaakanamo kurubani isumbelemu mbakana kuraeakako,

atawa o kurubani tunuamu

modhaangiana i aroaku.

9Iaku kumendeu bhekutarima sapi umane minaaka i bhanuamu,

atawa o bhembe umane minaaka i kandamu,

10roonamo bhari-bharia binata maila i koo o pewauaku,

tee uka bhari-bharia manga kadhambaaka modhaangiana i rewuna gunu.

11Iaku kumataua bhari-bharia manu-manu modhaangiana i gunu,

tee manga mahaluku modhadhi i nuncana koo o pewauaku.

12Ande kumaara, inda afaraluu kupaumbaakako,

roonamo alamu tee bhari-bharia antona o pewauaku.

13Iaku inda kukande dagina sapi umane,

inda uka kusumpu raana bhembe umane.

14Sukurumo i Aulataʼala to amembali pasombaamu to Incia,

tee upomeaia o tolauna onimu i KAWASANA OPU.

15Goraakaaku i wakutuuna umaseke,

Iaku bhekutulungiko,

tee ingkoo bheumuliangiaku."

16Maka to mia madhaki o KAWASANA OPU afirimani,

"Inda tee faʼedana ingkoo usarongi hukumuku,

tee upogauaka manga pojanjiaku.

17Roonamo ingkoo umendeu utoudhaniaka,

tee inda umaheruakea uka manga firimaniku.

18Ande upokawa tee mia manako, ingkoo uposabhangkaakea,

tee manga pande zina, ingkoo upooseakea.

19Muncumu utaroakea abhoasaka manga pogau madhaki,

tee o dhelamu sadia apekagau.

20Ingkoo utorotorosu uraeaka tee upogauaka witinaimu karomu,

tee ufitanaaia.

21Mboo sumaimo ipewaumu, maka Iaku inda tee uuʼuuku,

jadi ufikiria ande Iaku sii kupokana tee ingkoo.

Maka sii-sii bhekuhukumuko,

tee kubhawea o parakara incia sii i aroamu mamudhaakana umaʼanaia.

22Kamatamea o giu incia sii, e ingkomiu momalinguakana Aulataʼala,

kojagamo ancosala Kupabinasakomiu tee inda dhaangia mopasalaamatikomiu.

23Incema mopasombaakana sukuru i Iaku mboomo kurubani,

inciamo amuliangiaku;

o mia modhadhina i nuncana kajujuru,

Aulataʼala bhekususuakea kasalaamati to incia."