Kitabi Momangkilona Wolio
Zaburu 47
Aulataʼala Rajana Saangua Alamu
47:1-10
To kapalana molaguna. Zaburu minaaka i miana Korah.
E bhari-bharia lipu, pujimo Aulataʼala!
Bhija-bhijamea o Aulataʼala tee usambo-sambomo.
Roonamo KAWASANA OPU Momalanga sumai atomaeka mpuu,
Incia o raja maoge mokuasaina saangua alamu.
Incia apekatalo manga lipu tee adhawuakea i nuncana kuasata,
tee manga lipu adhikaia i tambena aeta.
Incia mangapiliaka tana
bhemomembalina tinauraka ibanggaakata saʼumurua.1
Ingkita o siwuluna Yakub,
uumati imaasiakana. Sela
Wakutuuna Aulataʼala akompa i kauncuramakana, manga mia asambo-sambo tee akaunde-unde,
tee atowiiakea sangkakala.
Laguakamea o lagu kapujia to Aulataʼala, laguakamea!
Laguakamea o lagu kapujia to Rajata, laguakamea!
Roonamo Aulataʼala o Rajana saangua alamu,
laguakamea o laguna kaadhari!
Aulataʼala satotuuna o Rajana bhari-bharia lipu,
Incia amboore i bhawona kauncuramakana momangkilo.
Manga kapalana lipu aporomusaka
to amembali uumatina Aulataʼala isombana Ibrahim.
Roonamo bhari-bharia mokuasaina alamu sii atungku i Aulataʼala,
Incia atomuliangi mpuu.
Source notes (1)
- Footnote tinauraka ibanggaakata saʼumurua: Tinauraka sumai siitumo Tana Kanaan, tana ijanjiakana Aulataʼala to Ibrahim tee manga siwuluna.
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.