Zaburu 41

Doʼa Emaniana Auntoaka Panyaki

41:1-14

1To kapalana molaguna. Zaburuna Daud.

2Amasanaamo mia mofaduliakana mia misikini!

KAWASANA OPU bheapasalaamatia i wakutuuna anarakaa.

3KAWASANA OPU bheajagania tee adhambaakea.

Sabutuna manga mia bheasarongiakea amasanaamo i lipuna mbooresana,

tee inda upasaraakaakea i manga musuna.

4KAWASANA OPU bheatulungia i wakutuuna amapii,

tee apauntoa minaaka i kapiina.

5Iaku kupogau, "E KAWASANA OPU, maasiakaaku,

pauntoa o panyakiku roonamo kukodosamo tee Ingkoo."

6Manga musuku apogauakaaku madhaki,

manga incia apogau, "Naepia incia bheamate mamudhaakana manga mia amalinguakea?"

7Manga mia mosoloaku inda amakate o ngangarandana;

manga incia apara-para afaduli tee agau-gau.

Manga incia apeelo lele madhaki minaaka i iaku,

kasiimpo alingka apetulatulaakea i dhala.

8Bhari-bharia mobanciaku apokamuntuiakaaku,

manga incia ahaejatiakaaku tee kadhaki.

9Pogauna manga incia, "Kapiina ahanda mpuu,

indamo bheamembali atopaunto." 101

Sampe moomini o sabhangkaku momakasuna iparacaeaku,

mokandena rotiku, ambulimo abhaliaku.

11Maka Ingkoo, e KAWASANA OPU, susuakaaku o kaasimu, tee pauntoaku minaaka i kapiiku,

mamudhaakana amembali kubalasi kadhakina manga musuku.

12Tee mboo sumai iaku kumataua ande Ingkoo umaasiakaaku

roonamo o musuku inda amembali asambo-samboakaaku.

13Ingkoo utulungiaku roonamo kakatena totona incaku,

tee udhikaaku i saripimu saʼumurua. 142

Atopujimo KAWASANA OPU, Aulataʼala isombana miana Israel,

sii-sii tee saʼumurua!

Aamin!