Zaburu 33

Manga Kapujia to KAWASANA OPU Isombana Miana Israel

33:1-22

1Sambo-sambomo rampaakanamo KAWASANA OPU, e manga mia mobanara!

Alaengamo mia momakatena incana apuji KAWASANA OPU.

2Emanimo sukuru i KAWASANA OPU tee umagasiaaka kecapi!

Laguakea o lagu kapujia to Incia tee umagasiaakea gambusu sapulu taliana.

3Laguakea to Incia saangu lagu bhaau!

Tikia pekalape o gambusumu, tee usambo-sambomo!

4Firimanina KAWASANA OPU sumai abanara,

tee bhari-bharia ikarajaana abukutiiakea ande Incia amembali atoparacaea.

5Incia amaasiaka kabanara tee kaʼadili,

saangua alamu abukeaka kaasina molagina.

6Minaaka i firimanina KAWASANA OPU o laiana apamembalia,

tee minaaka i poinuncana, bhari-bharia giu i laiana apadhaangiaia.

7Incia arombusaka uwena tawo mboomo arombusaka uwe i nuncana gusi,

tee mboomo andalaoge adhikaia i nuncana bendunga.

8Taroakamo saangua alamu amaeka i KAWASANA OPU,

tee taroakamo bhari-bharia mia i nuncana dunia atungku i Incia.

9Roonamo Incia afirimani sabutuna bhari-bharia amembali;

ande Incia adhawu parinta sabutuna bhari-bharia adhaangia tee amatangka.

10KAWASANA OPU apabatala opea ifikirina manga lipu,

tee apanainda opea ihaejatiakana manga incia.

11Maka o haejatina KAWASANA OPU sadhaadhaa saʼumurua,

tee o isikadina amatangka saʼumurua zamani.

12Amasanaamo mpuu o lipu mosombana KAWASANA OPU apamembalia Aulataʼalana,

amasanaamo mpuu uumati ipilina to mopotibhaakana tinaurakana.

13KAWASANA OPU apentiro minaaka i sorogaa,

tee akamata bhari-bharia maanusia.

14Minaaka i kauncuramakana, Incia atiliki

bhari-bharia momboorena i dunia.

15KAWASANA OPU mopebhanguina incana bhari-bharia maanusia,

KAWASANA OPU mokamatana bhari-bharia ipewauna manga incia.

16Samia raja inda atopasalaamati minaaka i kabharina suludaduna,

samia tantara mobarani inda bheasalaamati minaaka i kakaana.

17Ajarana potimbea inda amembali atotangkaaka to kasalaamati,

Moomini amakaa mpuu, o ajara inda amembali manga pasalaamati.

18Satotuuna, KAWASANA OPU afaduliaka manga mia momaekaia,

tee moharapuakana kaasina molagina

19to mopasalaamatina manga incia minaaka i mate,

tee apakande manga incia i wakutuuna umbaana balaana kaara.

20Incamami aharapuaka katulungina KAWASANA OPU,

Incia motulungina ingkita tee Incia amembali katangkesita.

21Roonamo Incia o incata akaunde-unde,

rampaakanamo ingkita taparacaea i sarona momangkilona.

22E KAWASANA OPU, taroakamo kaasimu molagina sadhaadhaa to ingkami

apokana tee opea mopadhana iharapumami i Ingkoo.