Kitabi Momangkilona Wolio
Zaburu 3
Doʼa Saeona to Tapoaro tee Musu
3:1-9
Zaburuna Daud, wakutuu incia apalaiaka karona minaaka i anana mokosarona Absalom.1
E KAWASANA OPU, abhari mpuu o bhaliku!
Abhari mpuu moewangiaku!
Abhari o mia mopogauakaaku,
"Aulataʼala amendeu atulungia." Sela2
Maka Ingkoo, e KAWASANA OPU, satotuuna o katangkesiku mojaganiaku,
Ingkoomo mopamembaliaku kutohoromati tee mopadhadhina incaku pendua.
Iaku kugora kuemani tulungi i KAWASANA OPU,
tee Incia alawaniaku minaaka i gununa momangkilo.3 Sela
Iaku kupotidhole kukole, kasiimpo alipa o mataku,
tee kubhangu roonamo KAWASANA OPU motukoaku.
Iaku inda kumaeka tee rewu-rewuna musu
bhemolibuaku minaaka i bhari-bharia rope.
Bhangumo, KAWASANA OPU, tulungiaku e Aulataʼalaku!
Umbe, Ingkoo ubhebhe naunauna bhari-bharia musuku,
tee upekakatu ngincina manga mia madhaki.
Kasalaamati aumba minaaka i KAWASANA OPU.
Barakatimu to uumatimu! Sela
Source notes (3)
- Footnote Absalom: Absalom sumai anana Raja Daud, bhemopekandawuna Daud minaaka i kauncuramakana, roonamo incia gauna bheamembali raja to abholosi Daud. Kamata 2Sa. 15:13--17:22.
- Footnote Sela: Aipomo tandana to aunto wakutuuna lagu sumai atolaguaka, atawa o tanda to ahanda apekaogea o suarana, atawa onina gambusuna. Amembali uka to tanda to morangoa mamudhaakana asuju.
- Footnote gununa momangkilo: Gunu Sion i Kota Yerusalem, tampana ibaadatina miana Yahudi, siitumo Baitulla. Siitumo, miana Yahudi kananeana asarongiakea Gunu Sion "gununa momangkilo."
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.