Zaburu 29

Kaogesana KAWASANA OPU i Nuncana Garura

29:1-11

11

Zaburuna Daud.

Pujimo KAWASANA OPU, e manga mahalukuna sorogaa,

pujimo kaogesana tee kuasana.

2Pujimo sarona KAWASANA OPU momulia

tee usombaia upake pakea momangkilo.

3Wakutuuna KAWASANA OPU apogau,

suarana Aulataʼala Momulia atorango angkolele

mboomo guntu i tangana andala.

4Suarana KAWASANA OPU amakaa mpuu,

Suarana KAWASANA OPU abukeaka kuasa.

5Wakutuuna KAWASANA OPU apogau, amembali akatuki manga puuna aras,

tee uka amembali apatobhata manga puuna aras motuwuna i Libanon.

6Incia apewau Gunu Libanon apekatiba-tiba mboomo anana sapi,

tee Gunu Siryon mboomo anana karambau.

7Suarana KAWASANA OPU apewau bherese apokilati.

8Suarana KAWASANA OPU apamembali tana matuu atorende,

KAWASANA OPU apamembali Tana Matuu Kades atorende.

9Suarana KAWASANA OPU amembali apakoana rusa bhawine mobhawa-bhawa,

tee apamembali manga koo amembali amatuu.

I nuncana Bhanuana Momangkilona

bhari-bharia uumati agora "Muliangimo KAWASANA OPU!"

10KAWASANA OPU akokuasa i bhawona mawa,

KAWASANA OPU o raja mokokuasa to saʼumurua.

11Maasangia KAWASANA OPU adhawu kakaa to uumatina,

tee abarakatiakea kasanaa tee kaʼamani to uumatina.