Zaburu 145

Lagu Kapujia to Kalapena KAWASANA OPU

145:1-21

1Lagu kapujiana Daud.

E Aulataʼalaku, e Raja, iaku bhekupekalangako,

tee bhekupuji saromu to saʼumurua.

2Saesaeo bhekupujiko,

tee bhekumuliangia o saromu to saʼumurua.

3Tapanamo kalanga o KAWASANA OPU tee alaenga mpuu atopuji!

Inda bhari-bharia sifatuna momaoge amembali amaʼanaia maanusia.

4Manga mancuana bheapuji opea mopadhana ikarajaamu i manga anana sakawana bhari-bharia siwuluna amataua,

tee bheapogauaka ande Ingkoo momakaana.

5Manga incia apakoleleaka kaogesamu momuliana

tee pewaumu inda momentela bhekufikiria i nuncana ngangarandaku.

6Mia bheapetulatulaaka manga ipewaumu momakaana,

tee bhekupakoleleaka kaogesamu.

7Manga incia bheakaunde-undeaka kaogesana saromu roonamo pewaumu momalape,

tee bheasambo-sambo roonamo kabanaramu.

8KAWASANA OPU sumai abukeaka kaasi tee rahumati.

Incia asabara mpuu tee o kaasina molagina amaoge.

9KAWASANA OPU sumai amalape i bhari-bharia mia,

tee rahumatina to bhari-bharia mahaluku mopadhana ipadhaangiana.

10Bhari-bharia ipadhaangiamu sumai bheasukuru i Ingkoo, e KAWASANA OPU,

tee bhari-bharia mia mosaalihi bheapujiko.

11Manga incia bheapogauaka kamuliangina pamarintamu,

tee apetulatulaaka kakaamu,

12sabutuna o maanusia amataua o kaogesana manga pewaumu,

tee kamuliangina pamarintamu amalanga.

13Pamarintamu o pamarinta mobakaa,

tee o kuasamu asadhaadhaa to saʼumurua.

KAWASANA OPU amembali atoparacaea i nuncana bhari-bharia janjina

tee bhari-bharia ipewauna abukeaka rahumati.

14KAWASANA OPU atulungi bhari-bharia mia monarakaa,

tee apekatangka bhari-bharia mia motungku.

15Bhari-bharia matana mia aantaantagiko,

tee Ingkoo uka udhawua kinande akawa wakutuuna.

16Ingkoo ubungkale limamu,

tee upadhaangiaaka opea ipeeluna bhari-bharia mahaluku mokoinyawa.

17KAWASANA OPU abanara i bhari-bharia dhalana,

amalape tee abukeaka rahumati.

18KAWASANA OPU atulungi bhari-bharia mia mogorana i Incia,

bhari-bharia mia mogorana i Incia i nuncana kabanara.

19Incia apadhaangiakea bhari-bharia ifaraluuna mia momaekana i Incia;

Incia uka arangoa o pekeena manga incia tee apasalaamatia.

20KAWASANA OPU ajagani bhari-bharia mia momaasiakea,

maka Incia apabinasa bhari-bharia mia madhaki.

21Iaku bhekupuji KAWASANA OPU,

tee bhari-bharia mahaluku bheapuji sarona momangkilo to saʼumurua.