Zaburu 142

Doʼana Samia Motopajere

142:1-8

1Lagu kaadharina Daud wakutuuna incia apalaiaka Saul tee aopo i nuncana lia. Saangu doʼa.

2Tee suara makaa kugora i KAWASANA OPU;

tee suara makaa kuemani kaasi i KAWASANA OPU.

3I aroana kupeenci,

kupaumbaakea bhari-bharia kanarakaaku i Incia.

4Wakutuuna amate akalaku,

Ingkoo umataua o dhalaku.

I dhala bheilaloiku

manga musuku abuniaka katapu to iaku.

5Poilimo i weta kaanaku tee kamatea,

inda samia uka mokamataaku.

Inda dhaangia tampana peulusaku,

tee inda samia uka mofaduliakaaku.

6E KAWASANA OPU, iaku kugora i Ingkoo.

Pogauku, "Ingkoomo tampana peulusaku,

tee tangkanamo Ingkoo ifaraluuku i nuncana dhadhiku sii."

7Perangoia o doʼaku

roonamo indamo tee kakaana o bukuku.

Pasalaamatiaku minaaka i manga musu mosikisaaku

roonamo manga incia alabhi kakaana minaaka i iaku.

8Palimbaaku minaaka i katorongku,

mamudhaakana kumembali kusukuru i Ingkoo.

Manga mia mosaalihi bheaporomu tee iaku to tapuji saromu,

roonamo Ingkoo padhamo upewau malape i iaku.