Kitabi Momangkilona Wolio
Zaburu 137
Kaporona Inca i Bhiwina Umala Babel
137:1-9
I bhiwina umala Babel,
iwe sumakomo ingkami tauncura tee tatangi
ande taudhani Sion, mbooresana miana Israel.
I manga puuna gandarusa i tampa sumai,
ingkami tapaloe kecapimami
roonamo iwe sumai manga miana Babel mangataangi
tee atumpu ingkami talaguakea,
mia mopisakina ingkami manga tumpu talaguakea manga lagu kaunde-unde, pogauna,
"Laguakamo to ingkami sala saangu lagu minaaka i Sion."
Tuaapa amembali ingkami talaguaka lagu to KAWASANA OPU
i lipu dhaga?
E Yerusalem, ande kumalinguakako,
taroakamo limaku indamo amembali amagasiaaka kecapi!
Taroakamo dhelaku indamo amembali alagu
ande kumalinguakako,
tee ande inda kupamembali Yerusalem
tampa ikaunde-undeakaku mpuu.
E KAWASANA OPU, udhania o miana Edom,
i wakutuuna Yerusalem atopahancuru, manga incia apogau,
"Patobhatamea! Patobhatamea sakawana i tana!"
E raʼeatina Babel, ingkomiu bheutopabinasa!
Amasanaamo mia mobalasina ingkomiu
roonamo pewaumu momadhaki i ingkami.
Amasanaamo mia morakona manga anaana maidhiidhimiu
tee arambitakea i bhatu!1
Source notes (1)
- Footnote Amasanaamo mia morakona manga anaana maidhiidhimiu: Rua giu molaengana imatau. Bhaa-bhaana, manga lipu modhaangiana i saripina lipu Israel padhamo apewau giu mopokana to miana Israel. Sapadhana sumai, Kawasana Opu afirimani ande o Babel bheanamisi giu mopokana to amembali kabalasina pewauna manga incia.
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.