Kitabi Momangkilona Wolio
Zaburu 135
Tangkanamo Kawasana Opu Molaengana Ipuji
135:1-21
Pujimo KAWASANA OPU!1
Pujimo sarona KAWASANA OPU!
Pujimea, e manga bhatuana KAWASANA OPU,
e manga mia molaianina i Bhanuana KAWASANA OPU
i tanalapa i aroana Bhanuana Aulataʼalata.
Pujimo KAWASANA OPU roonamo Incia amalape,
laguakamea manga lagu kapujia to sarona,
roonamo sarona amakesa.
KAWASANA OPU padhamo apili Yakub to karona,
tee o miana Israel apamembalia pewauana imaasiakana.
Satotuuna kumataua ande o KAWASANA OPU amaoge mpuu,
tee o Aulataʼalata alabhi o kaogena minaaka i bhari-bharia dewa.
KAWASANA OPU apewau opea ipeeluna,
malape i sorogaa atawa i alamu,
malape i tawo atawa i andala.
Incia aumbaaka gawu minaaka i tapana alamu,
Incia apatiumba bhibhito apoose tee wao,
tee apalimba ngalu minaaka i tampana atodhika. 2
Incia mopekamatena manga anaana tumpe i Mesir,
malape maanusia atawa o binata.
Incia mopadhaangiana manga tanda tee manga muuzizati
i tanga-tangana miana Mesir,
aewangi Firaun tee bhari-bharia pagawena.
Incia mopekatalona manga lipu
tee apekamate manga raja momakaa--
siitumo Sihon rajana Amori, tee Og rajana Basan,
tee bhari-bharia raja i Kanaan.
Kasiimpo adhawuaka manga lipuna Kanaan to apamembalia pusaka,
siitumo o pusaka to miana Israel o uumatina sumai.
E KAWASANA OPU, saromu abakaa,
e KAWASANA OPU, bhari-bharia siwulu bheaudania saʼumurua opea ipewaumu.
KAWASANA OPU bheaewaaka parakarana uumatina,
tee amaasiaka manga bhatuana. 3
Barahalana manga lipu inda mosombako atokarajaa minaaka i bulawa tee pera,
ikarajaana limana maanusia.
Manga barahala sumai akomuncu, maka inda amembali apogau;
akomata, maka inda apokamata;
akotalinga, maka inda aporango.
Manga incia inda dhaangia o poinuncana.
Bhari-bharia mia mokarajaana barahala tee bhari-bharia moparacaeaia
bheamembali mboomo barahala sumai tee inda bheamembali apewau opeopea uka.
E siwuluna Israel, pekaogemo sarona KAWASANA OPU!
E manga imamu, siwuluna Harun, pekaogemo sarona KAWASANA OPU!
E siwuluna Lewi, pekaogemo sarona KAWASANA OPU!
E manga mia momaekana i KAWASANA OPU, pekaogemo sarona KAWASANA OPU!
Pekaogemo sarona KAWASANA OPU minaaka i Sion;
Incia momboorena i Yerusalem.4
Pujimo KAWASANA OPU!
Source notes (4)
- Footnote Pujimo KAWASANA OPU! I nuncana pogau Ibrani, oni incia sii Haleluya. Mboo sumai uka i kapadhaana zaburu incia sii.
- Cross-reference Limb. 12:28-30.
- Cross-reference Zab. 115:4-8; Wah. 9:20.
- Footnote Incia momboorena i Yerusalem: Moomini o Aulataʼala adhaangia i saangua alamu sii, maka Incia padhamo apatotapuaka Kota Yerusalem minaaka i zamanina Israel apamembalia to Bhanua Momangkilo to apogauaka umbaana tee ajagani sarona.
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.