Zaburu 132

Raja Daud tee Kota Sion, Ipilina KAWASANA OPU

132:1-18

1Laguna ziara.

E KAWASANA OPU, maasangia uudhani Daud,

tee bhari-bharia kanarakaana inamisina.

2Incia padhamo aposumpa i KAWASANA OPU,

tee ajanji i Aulataʼala Momakaa isombana Yakub,

3"Satotuuna, iaku inda bhekupesua i nuncana kema mbooresaku

atawa kukole i kolemaku;

4Satotuuna inda bhekutokole

atawa amangkoo mataku

5ande indapo kupotibhaaka tampa to KAWASANA OPU,

tee saangu mbooresa to Aulataʼala Momakaa isombana Yakub."

6Satotuuna, ingkita padhamo tarangoa o pokaiana tee Sorongana Pojanjia1 sumai i Bait Lahim,

tee padhamo tapotibhaakea i Tana Yaar.2

7Maimo talingkaaka i mbooresana i Yerusalem!

Maimo tasuju tee tasombaia i aroana kauncuramakana.

8E KAWASANA OPU, pekadheimo ulingka i tampa mbooresamu,

tee upobhawa tee Soronga Pojanjia, tandana Ingkoo ukokuasa.

9Maasangia manga imamu sadia apewau kabanara,

tee taroakamo manga mia mosaalihi asambo-sambo tee akaunde-unde.

10Roonamo Daud, o bhatuamu,

bholi umendeua o raja mopadhana ilantimu.

11KAWASANA OPU padhamo aposumpa mpuu-mpuu tee Daud,

tee Incia inda bheamalinguaka opea ijanjiakana,

"Samia anamu minaaka i karomu

bhekupamembalia raja."

12Ande manga anamu akeniakea mpuu-mpuu o pojanjiaku

tee ataʼatia manga parinta bheiadhariakaku to manga incia,

sumaimo manga opu-opuana uka bheamembali raja

sakawana saʼumurua."

13KAWASANA OPU padhamo apili Sion,

tee gauna apamembalia tampana mbooresana.

14"Siimo mbooresaku sakawana saʼumurua,

Iwe siimo bhekumboore roonamo kupeelua.

15Iaku bhekudhawuakea bhaku motaralabhi-labhi,

tee bhekupekambosuakea tee roti manga mia misikini.

16Manga imamuna Yerusalem bheasusuaka kasalaamati moumbana minaaka i Iaku,

tee manga mia mosaalihi bheasambo-sambo tee akaunde-unde.

17Iwe sumakomo bhekuangka siwuluna Daud;

Iaku bhekupamembali o siwuluna aparinta sakawana saʼumurua mboomo sulu momainawana torosu.

18Manga musuna bhekupekaeaia,

maka incia, bhekupakanaakea mahakota bhemokakila-kila i bhaana."