Kitabi Momangkilona Wolio
Zaburu 13
Doʼana Mia Moparacaeana tee Kaasina Aulataʼala
13:1-6
To kapalana molaguna. Zaburuna Daud.
Sakawana naepia, e KAWASANA OPU? Saʼumurua buaka Ingkoo umalinguakaaku?
Sakawana naepia Ingkoo ubuniaka roumu minaaka i karoku?
Sakawana naepia kutanggo kanarakaa i nuncana karoku?
Saeoa amaporo incaku.
Sakawana naepia akuasaiaku musuku?
E KAWASANA OPU, Aulataʼalaku, kamatea tee ulawaniakumo.
Pekatangkea o bukuku mamudhaakana inda kumate!
Bholi utaroakea o musuku apogau, "Kutalomea!"
Tee o bhaliku akaunde-unde wakutuuna kusindoli.
Maka kuparacaea o kaasimu molagina,
Incaku akaunde-unde roonamo upasalaamatiaku.
Iaku gauku kulagu to KAWASANA OPU
roonamo Incia padhamo apewau kalape tee iaku!
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.