Zaburu 127

Rahumatina Kawasana Opu Auwalina Kasalaamati

127:1-5

1Lagu ziarana Sulaiman.

Ande mencuana KAWASANA OPU mopakarona bhanua,

asia-siamo kangulena mia mopakaroa.

Ande mencuana KAWASANA OPU mojaganina kota,

asia-siamo manga suludadu mojagania.

2Asia-siamo ubhangu saeona,

tee ukarajaa torotorosu inda uunto-unto sakawana pontanga malo,

tee ukande kinande ipotibhaakamu minaaka i kanguleana bukumu tee ulilaho;

roonamo Aulataʼala adhawu mia imaasiakana i wakutuuna akole.

3Satotuuna ana umane sumai o rahumati minaaka i KAWASANA OPU,

tee o antona kadhuma satotuuna saangu fahala.

4Mboomo anana pana i limana samia suludadu,

mboo sumaimo manga ana umane i wakutuuna amangura.

5Amasanaamo mia mopabukena

dhingkanana panana tee anana pana.

Incia inda bheapotibhaaka kaea,

wakutuuna apogau tee manga musuna i bhambana lawa kota.